Redrum Teatro, a escena contra a intolerancia

Varios temas superpóñense en O pequeno poni: o acoso escolar, a homosexualidade estigmatizada, a psicopatía colectiva que leva á violencia e á humillación do diferente... A compañía Redrum prepara desde esta semana a montaxe da obra de Paco Bezerra (El Alquián, Almería, 1978), unha das voces máis destacadas do panorama escénico estatal e o autor máis novo en conseguir o Premio Nacional de Literatura Dramática en 2009. A función, protagonizada por Guillermo Carbajo e Laura Míguez, terá a súa estrea dentro da programación do Festival Internacional de Teatro de Outono (FIOT), o próximo 13 de outubro, no Pazo da Cultura de Carballo (Bergantiños). O pequeno poni narra a historia de Luismi, un rapaz acosado polos seus compañeiros porque leva unha mochila de cores da serie animada My Little Pony. A comprometida situación leva ao director do centro a prohibirlle ao neno que vaia a clase coa mochila, o que provoca un debate entre os pais que non saben como reaccionar: apoiar o fillo e defender o seu dereito a levar a mochila, e polo tanto a manifestar o seu a dereito á diferenza, ou aceptar a intolerancia do grupo para evitar a fustrigación e o acoso. As ameazas á infancia, no escenario Aceptar a diferenza Paco Bezerra é un dos autores máis libres da escena estatal. Hai pouco protagonizou un desagradábel episodio cando a súa obra Muero porque no muero, la vida doble de Teresa, protagonizada por unha Santa Teresa de Xesús que volve á vida na actualidade, foi retirada sen explicación ningunha da programación dos Teatros del Canal de Madrid. Para case todo o mundo foi un acto de censura, excepto para os responsábeis da institución dependente da Comunidade de Madrid, que alegou "un problema económico xerado pola inflación". O pequeno poni, estreada en Madrid en 2016, estaba baseada nuns feitos reais sucedidos nos Estados Unidos: Grayson Bruce, de nove anos, foi excluído da súa escola tras ser sometido a reiteradas agresións físicas e verbais por parte dos seus compañeiros por levar unha mochila da serie de televisión á que se refire Bezerra na súa obra. A dirección do centro considerouno un "detonante de acoso" e acusou o menor de "disrupción nas aulas". Redrum, despois de pór en escena Hamelín, de Juan Mayorga, aínda en cartel, retoma o tema da vulnerabilidade da infancia ante os perigos dunha sociedade que non é quen de brindarlle unha protección firme. "Supoño que hai temas que responden a preocupacións persoais ou que resultan máis atractivos", comenta Álex Sampayo, director da montaxe, en conversa con Nós Diario. "A posibilidade de montar esta obra xurdiu xa hai anos, en 2016, cando estabamos preparando A nena que quería navegar, que trataba o mesmo tema, o de aceptar a diferenza, pero nun código familiar. Logo montamos tamén O mozo da última fila e Hamelín, que teñen temáticas máis ou menos similares. A obra estaba agardando a súa oportunidade". A 7ª edición do Certame Metro Cadrado do FIOT de Carballo xa ten finalistas Sampayo recoñece que o tema permanece sendo moi actual, que as noticias sobre bullying seguen ocupando titulares, mais advirte que non é ese o único atractivo da montaxe. "A obra de Paco Bezerra sempre me pareceu moi potente, moi interesante desde o punto de vista teatral. E O pequeno poni é, quizais, a súa obra máis asumíbel para unha compañía pequena como a nosa, a máis sinxela de levar a escena", explica. "Ademais, a elección responde tamén a unha dinámica que levamos desde hai anos de combinar montaxes de varios actores con outras cun formato máis íntimo, que se poidan distribuír en máis espazos". Sampayo tamén é consciente da expectación que pode xerar a escolla dun dramaturgo como Bezerra, no punto de mira dun debate que sacode o mundo do teatro e, en xeral, de toda a creación, no conxunto do Estado. Especialmente despois de que, nunha comparecencia na Comisión de Cultura da Comunidade de Madrid -precisamente para debater o presunto caso de censura sobre a súa obra Muero porque no muero- o autor se encerellase nunha agre disputa co deputado de Vox Gonzalo Babé, que acusou a obra de ser "daniña e esperpéntica". "É unha mágoa que un dramaturgo cunha obra tan interesante coma el estea de moda por ser xustamente un pioneiro en sufrir a censura que logo se foi expandindo por toda a xeografía estatal. Mais iso tamén demostra que o teatro está onde debe de estar, debatendo os problemas que afectan a sociedade, propiciando a discusión sobre os temas que interesan á cidadanía", remata Sampayo. A cultura do narcisismo a escena Próxima estrea no FIOT de Carballo A obra de Redrum Teatro, ademais do elenco formado por Guillermo Carbajo e Laura Míguez, completa o seu equipo artístico co traballo de Carlos Álvarez-Ossorio na iluminación, de Fernando Epelde á fronte do espazo sonoro e de David Fidalgo como responsábel das animacións que acompañarán en escena o espectáculo. A compañía xa está ensaiando a función para estreala en Carballo na próxima edición do Festival Internacional Outono de Teatro.