Pontón mantivo unha reunión co presidente e co director xeral de Galaxia -Antón Vidal e Francisco Castro, respectivamente- nun encontro en que lles transmitiu a idea de que, a xuízo do BNG, o sector do libro precisa dun apoio real por parte da Administración pública galega, dado o seu papel clave na conformación de "calquera sistema cultural" e, no caso concreto da Galiza, o seu rol decisivo na normalización da lingua.
A líder do BNG ve o sector editorial no noso país "amezado pola crise económica e polos cambios de modelo coa transformación dixital", mais tamén en perigo "pola falta de políticas públicas de promoción da leitura".
A portavoz do BNG -que acudiu á sede de Galaxia acompañada do parlamentar Luís Bará e dos dirixentes da formación frontista en Vigo Serafín Otero e Manuel Caride- trasladou aos responsábeis da editorial que os catro peares da alternativa nacionalista para o sector do libro son:
- O cumprimento efectivo da Lei Galega do Libro e da Leitura.
- A posta en marcha dunha Mesa do Libro como órgao de diálogo con todos os axentes implicados no sector.
- A recuperación nesta lexislatura dos orzamentos dedicados á promoción do libro e da leitura existentes antes da crise en 2009 (minguaron máis de 50 por cento)
- A derrogación de toda a normativa contraria á normalización da lingua galega, a comezar polo chamado decreto do plurilingüismo, cuxa posta en práctica penalizou as editoras galegas ao diminuír o número de libros de texto en galego no ensino.
"Se non facemos unha aposta por apuntalar o sector editorial serán outros os que editen os nosos libros. Temos un idioma e unha cultura que precisa dun sector editorial forte para que toda a produción científica, de ensaio e literaria, teñan cabida en lingua galega", dixo Pontón nun encontro coa imprensa realizado na propia sede de Galaxia.