O concelleiro de Cultura de Pontevedra, Demetrio Gómez, presentou esta terza feira o programa do Salón do Libro, que decorrerá entre o 1 e o 17 de marzo e que "vai ser unha experiencia máxica e queriamos que así fora no 25 aniversario do Salón. Este ano botamos a casa pola fiestra".
17 días de actividades, 47 obradoiros, 38 contacontos, 21 espectáculos e concertos para todos os públicos, ademais de cinema, Rodalibros, camiñadas, faladoiros e exposicións compoñen unha programación do que promete ser o Salón do Libro "máis intenso dos últimos anos", asegurou Gómez.
Ademais, das 300 actividades que compoñen o programa, 150 son exclusivas para os centros educativos. Entre elas, a inauguración de '25 anos de maxia: faiado dos contos que foron ou poderán ser', dirixido por Manuel Albariñas, que contará co Ballet de Galicia, o Coro do IES A Xunqueira I, Su Garrido Pombo, Maxia na Manga...
Como novidade, esta edición do Salón do Libro tamén inclúe programación de cinema os domingos pola mañá, así como actividades especiais polo 8 de marzo, Día Internacional das Mulleres Traballadoras, con 'Superheroínas con mandil' ou 'Fábrica de feitizos e igualdade'.
Segundo explicou Gómez, a maxia toma un papel protagonista este ano e Pontevedra contará con 11 magos e magas facendo nove espectáculos de prestidixitación diferentes: o mago Paco, o mago Teto, Javier Muro, Pedro Volta, a maga Fani e, “por se fose pouca maxia, recuperamos a presenza dos pastequeiros cun roteiro que terá lugar o sábado 16 para descubrirmos a súa pegada na nos acidade”.
“No Salón do Libro ten que haber unha programación específica arredor dos libros e esa está absolutamente todos os días. Todos os días hai sesións de contos de contadores e contadores galegos, acompañados por contadores cataláns e descubrimos gazas a eles, cultura convidada, que existe un grupo de persoas moi interesante, catalano-galegas ou galego-catalás que tanto desde que aquí como desde Catalunya crean xuntando as dúas linguas”, explicou o concelleiro.
