A música galega busca a proxección internacional

Ampliar a proxección exterior da música galega, mostrando todo o seu potencial. Esta é a intención de Focus Galicia, un intenso programa de actividades que inclúe showcases, presentacións e reunións e ao que están convidados responsábeis de 25 festivais e axencias de distribución e representación artística de trece Estados: Alemaña, Brasil, Canadá, Corea do Sur, Chequia, Chile, Francia, Italia, Mozambique, Portugal, Reino Unido e Uruguai. Como previa do festival Womex, Focus Galicia -que decorrerá do 22 ao 24 de outubro en Compostela e nas Rías Baixas- tentará "maridar música e territorio", a través das actuacións de dez grupos e artistas seleccionados por un xurado profesional. Abraham Cupeiro, Budiño, Catuxa Salom, De Ninghures, García MC &amp; Nación Quilombo, Mario G. Cortizo, Mercedes Peón, Samudra Trio, Xurxo Fernandes e Zeltia Irevire poderán mostrar o seu directo á delegación internacional invitada. Patricia Hermida, presidenta da Asociación Galega de Empresas Musicais (AGEM) e membro do comité de selección que escolleu as participantes de entre unha cincuentena de proxectos presentados á convocatoria, declara, en conversa con Nós Diario, que "se trataba de obter unha representación do que se está a facer agora mesmo na Galiza, de ofrecer un retrato do noso pulso creativo actual. E creo -e aí estabamos de acordo unha gran parte dos membros do comité- que estamos máis fortes que nunca. Por iso foi moi complicado facer as escollas". Focus Galicia pretende dar a coñecer as súas propostas nun contexto distendido que pretende contrastar co ritmo acelerado do Womex, no que os proxectos se mostran sen apenas tempo para a reflexión. "Os programadores están nun contexto moi relaxado e tranquilo, ao contrario que no Womex, que é unha feira moi estresante, onde se presentan moitas cousas ao mesmo tempo e resulta complicadísimo poder ver todas as bandas que che poden interesar como programador", explica Hermida. "Ademais, solistas e grupos teñen, en moitas ocasións, dez minutos escasos para mostrar o seu traballo, un tempo que, obviamente, non dá para mostrar todo o seu potencial. Aquí, pola contra, tratamos de xerar espazos de debate e de conversa, de crear axendas nas que músicos e organizadores poidan charlar pausadamente sobre os seus proxectos". Neste sentido, o programa do evento tamén contempla visitas culturais, recepcións institucionais e encontros profesionais para o intercambio de experiencias, propiciando os encontros dos profesionais galegos con compañeiros doutras latitudes. A música tradicional na escola: para todas, para todos, para todo O programa As propostas comezarán o domingo 22, na sala Riquela de Santiago, onde actuarán Samudra Trío e Catuxa Salom. Ao día seguinte, segunda feira 23 de outubro, no Salón Teatro compostelán, serán Mercedes Peón e Zeltia Irevire as que suban ao escenario. Serán actuacións de curta duración que servirán como mostra do que as protagonistas poden realizar sobre as táboas. En Focus Galicia colaboran tamén as Bodegas Martín Códax, cuxas instalacións de Cambados acollerán, ese mesmo día 23, tres das actuacións previstas para o público profesional, as de Mario G. Cortizo, De Ninghures e Abraham Cupeiro. Na terza feira, o hotel NH Collection de Santiago acollerá encontros e sesións de pitching con presentacións a cargo de Helena Egea, Adrian Timms, Iria Estévez, Lontreira, Boroa, Francisco Amil, Hydn, Artyc Content, Cartometrics e Cordas en Harmonía. O encontro ten un carácter "eminentemente profesional", dirixido a músicos e aberto ao sector, mais tamén terá unha parte que o público xeral poderá compartir, o último día, cun concerto na sala Capitol de Santiago de Xurxo Fernandes, Budiño, MC García. &amp; Nación Quilombo, ao que poderá asistir calquera persoa con entrada gratuíta até completar a capacidade da sala. O MUMI tece redes entre as músicas da Galiza e Portugal Unha ferramenta útil Se cadra, desde o público non se advirten as vantaxes dun encontro como este pero "é unha ferramenta que ben utilizada pode ser moi útil", afirma Hermida. "Os programadores convidados son profesionais con moitos contactos que poden recolocar os proxectos que coñeceron mesmo que eles sigan unha liña de programación na que estes non teñan cabida". A presidenta de AGEM fala desde a experiencia propia: en 2014 traballaba co Cuarteto Caramuxo, que foi escollido para participar na primeira edición do Focus Galicia. "Abre moitas portas e non podemos esquecer que grazas a este encontro se abriron mercados para a música galega como o de Xapón ou o da India", subliña. Segundo Hermida, estamos nun tempo ambiguo: existe unha gran potencia creativa pero, ao mesmo tempo, resulta moi complicado, para as persoas que se dedican á música, proxectar no mercado as súas propostas, poder saír e facerse un oco. Ademais da calidade musical, Hermida enfatiza o gran traballo que está facendo a xente nova por adoptar linguaxes -"non só no musical, senón en todo o que supón o contacto co público, que é tamén moi importante"- que logren conectar coa mocidade. "Obviamente, se a proposta musical non era válida non se ía forzar nada", matiza, "pero a escolma resultante paréceme moi representativa da variedade e da calidade do que se está a facer agora neste terreo da música tradicional e as músicas do mundo, desde o máis ortodoxo até traballos de fusión como os de Catuxa Salom, por exemplo, con esa fusión coas músicas latinas, ou como De Ninghures, que desenvolven un traballo verdadeiramente enerxético. Agora toca traballar e tratar de presentar a música nas mellores condicións dentro deste foro". Mercedes Peón: "'Nación' atravesouse coa miña música e eu coa obra de Margarita Ledo" Propostas ortodoxas e innovadoras "Custou facer a selección, pero fomos moi exhaustivos e creo que logramos un equilibrio entre propostas novas e máis clásicas", relata Patricia Hermida. "Algunhas propostas -como as de Budiño ou Mercedes Peón- tiñan que estar case como recoñecemento histórico. Mais tamén premiamos algúns proxectos que -sempre tendo en conta o tipo de música que é obxecto do Womex- que merecen un recoñecemento pola audacia con que se enfrontan á música tradicional. Hai moitas ganas e moita forza e os resultados posúen unha calidade indubidábel".