A Mostra do Encaixe de Camariñas vira cara á vangarda

Modernidade, vangarda e moda. Son os conceptos que manexa a 33ª edición da Mostra de Encaixe de Camariñas para xustificar o lema escollido este ano: Camariñas sorprende. O cambio de imaxe percíbese xa desde o cartel, obra do deseñador Esteban Freiría, que pretende reclutar a mocidade cunha visión máis desenfadada da Mostra. Inaugurada oficialmente esta cuarta feira pola alcaldesa de Camariñas, Sandra Insua, o director xeral de Comercio da Xunta da Galiza, Manuel Heredia, e a vicepresidenta segunda do Goberno do Estado, Yolanda Díaz, a edición deste ano mantén a moda no centro, combinando os desfiles máis rompedores coas tradicionais demostracións de palilleiras, transformando unha artesanía secular nun elemento da vangarda do deseño. A Mostra do Encaixe é testemuño da supervivencia das artes e oficios populares, sendo un expoñente dunha tradición que, como todas as prácticas que permanecen vivas, se renova e actualiza constantemente. Ás tradicionais seccións -PequEncaixe Grandes Deseñadoras, Noveis Deseñadoras, ArtEncaixe, Delegacións Internacionais, e Encaixeiras Sénior- súmase este ano outra máis, ReEncáixame, que consistirá na reinterpretación dunha colección de moda antiga, reutilizando tanto os deseños como as pezas de encaixe. Con esta nova sección preténdese demostrar que a de Camariñas "é unha artesanía de calidade que pode ser reciclada sen ningún tipo de problema noutras prendas, reducindo así o posíbel impacto ambiental negativo", explica a concelleira de Encaixe, Encarna Liñeiro. Modernidade e tradición: o encaixe galego na moda actual Grandes nomes Dentro das grandes firmas que desfilarán este ano poden atoparse figuras de prestixio como a "raíña do encaixe", Sara Lage, coa súa característica superposición de prendas e mestura de texturas; Devota &amp; Lomba, que se afastan da aplicación tradicional do encaixe para convertelo nunha xoia independente do traxe; o coruñés José Matteos, referente no ámbito da moda nupcial; o galego afincado en Marbella Esteban Freiría, que presentará moda xuvenil e urbana; a mestura de tradición e vangarda de El Pulpo; a granadina Claudina Mata, que buscará sorprender con traxes nupciais inspirados no cabaré; ou as creacións "sen xénero" de imaxinario naif de Anamingo, firma coruñesa fundada por Ana María Vázquez e Francisco Basteiro. Por outra parte, o concurso de Concurso de Noveis Deseñadores será desputado por 35 persoas finalistas, a maioría delas procedentes de distintas escolas de deseño de todo o Estado. No ámbito internacional, a Mostra volve contar cunha ampla representación chegada desde obradoiros de Sofía (Bulgaria), Krakovani (Eslovaquia), La Turballe (Francia) Ingenio (Gran Canaria), Gubbio, Novedrate e Trapani (Italia), Bobowa (Polonia). Peniche e Serra d’el Rei (Portugal) e Palickovaní (República Checa). Ademais, no eido solidario, estará presente outro ano máis a asociación Stof Fa, unha entidade que aglutina a persoas afectadas pola Ataxia de Friedreich a nivel estatal. Dolores Lema: "O alumnado da Escola de Encaixe de Camariñas asegura o futuro da tradición" ArtEncaixe O desfile de ‘ArtEncaixe’ continúa consolidándose e atraendo a artesáns de diferentes puntos da Galiza para demostrar que o encaixe é versátil e pode adaptarse a diferentes materiais. Este ano repetirá participación a Escola de Arte e Superior de Deseño Mestre Mateo, de Santiago de Compostela, coa participación do alumnado do primeiro curso de Xoiería. Estilo Aramar e Feituras tamén conformarán a pasarela ArtEncaixe. O primeiro, un taller dedicado a conseguir complementos únicos, e o segundo de cerámica tradicional creativa. Outros artesáns presentes en ArtEncaixe serán Mar Barral, pioneira na aplicación da estampación botánica na cerámica; Suso Calo, especializado en artesanía en prata e talla; a firma Ondas do Mar, que xunta encaixe e pinceis; Lola Logaro, que integra o encaixe en prendas de punto e ganchillo; ou elena Molina, que traballa con complementos aos que aplica xoiaría. E outro ano máis, a cerámica de Buño volve mesturarse co encaixe de Camariñas a través do traballo de catro obradoiros: Feituras, Obradoiro Tonio, Alfarería La Cacharrera e O Rulo. Tecidos e traxes: patrimonio cultural Música, libros e escena Pero o programa da Mostra conta, ademais de con múltiples pasarelas e actos que enxalzan ás palilleiras e ao encaixe, cun nutrido programa de actividades culturais que dan un paso máis no prestixio do evento. Lucía Pérez foi a encargada de abrir o programa musical no desfile de Grandes Deseñadoras que tivo lugar esta cuarta feira. Seguirana a viguesa Hydn, nos desfiles de Noveis Deseñadores de hoxe e o grupo Astarot, que lle poñerá a súa sinatura musical á clausura o domingo 31 de marzo. Ademais, durante os cinco días poderán escoitarse nos pavillóns da Mostra, o folclore das agrupacións Abrindo Rejo, Con toda en banda, Vaiche Boa, Asociación Mar Devalado de Camelle e Asociación As Cansorriñas. E no VII Encontro de Corais participarán a Coral Polifónica Santa María de Cambre, a Coral Oliveira do Monte Branco e a Coral Brisas do Mar de Camariñas (domingo 31 ás 12 horas). E tamén outros ámbitos da cultura teñen cabida nesta festa do encaixe: durante estes días presentaranse os libros Querida Camariñas... Lo que debí decirte, de Ainhoa Conde (hoxe ás 11.50 horas), Tres Imperios, de Alfonso de Sas (hoxe ás 12.20 horas), Camariñas meu curruncho e Beldoña miña barca de Antonio Puertas Lema (mañá ás 12 horas) e O pracer da chuvia de Manuel Vázquez (mañá ás 12.20 horas). E tamén a escena terá o seu oco: o sábado, ás 20.30 horas, o actor Carlos Blanco interpretará un monólogo.