A directora de escena e artista visual Marta Pazos presentará, do 21 de marzo ao 21 de abril, no Teatro Solís de Montevideo, a obra de García Lorca El público. Pazos aceptou a invitación do actual director da Comedia Nacional de Montevideo (Uruguai), Gabriel Calderón, para poñer en escena a obra.
Formada por un elenco estable de máis de 30 intérpretes, está considerada unha das compañías máis prestixiosas de América Latina. Foi fundada en Montevideo en 1947 e, en 1949, Margarita Xirgu pasou a ser a súa directora.
O Lorca máis arriscado
En 2021, a artista estreou Viaje a la Luna, no Teatre Lliure, e Comedia sen título, no Teatro María Guerrero, producida polo Centro Dramático Nacional. Agora, nesta primavera de 2024, volve sobre un texto do dramaturgo e poeta granadino "coa máis profunda das súas obras escénicas", en palabras da propia Marta Pazos.
El Público foi escrito en 1930 polo autor e é a súa peza máis vangardista, experimental e arriscada, tamén a máis persoal e confesional. Considerado un dos clásicos da vangarda histórica do teatro, Pazos sinala que "El Público é unha obra chea de símbolos; poboada de berros honestos que piden espertar a dobre moral do seu tempo e da súa arte”.
Entre as últimas postas en escena de Pazos destacan a estrea mundial da ópera Alexina B., de Raquel García-Tomás, sobre a biografía da icona intersexual Herculine Barbin, ou a estrea mundial da premiada ópera Je suis narcissiste, tamén de Raquel García Tomás, ambas pezas finalistas nos International Opera Awards (2020 e 2023) á mellor estrea mundial.
