Entre o 29 de xullo e un 1 de agosto

Foz acolle as XXIV xornadas de historia local

A Casa da Cultura Poeta Manuel María acollerá as palestras de Fernández Pacios, Pereira Martínez, Francisco Rodríguez e Rafael Quintiá.
Foto xornadas.
photo_camera As xornadas de historia cumpren vinte e catro anos

O camiño de Santiago por Foz, a masonería na Mariña, o século XIV na comarca e os obxectos curativos e amuletos centran as xornadas de historia organizadas, por vixésimo cuarto ano, pola asociación Pomba do Arco. Terán lugar na Casa da Cultura Poeta Manuel María da vila focega do 29 de xullo ao primeiro de agosto. 

As xornadas arrancan este luns, 29 de xullo, ás 20:30 cunha palestra a cargo do historiador focego Xoán Ramón Fernández Pacios titulada "O camiño de Santiago por Foz". O investigador mariñán é un referente dos estudos xacobeos na Mariña lucense, autor de traballos sobre o hospital de peregrinos de San Martiño de Mondoñedo ou o Camiño do Mar que, partindo de Ribadeo, percorría toda á area costeira da Mariña até chegar a Ferrol, onde ligaba co Camiño Inglés. Unha das achegas centrais de Pacios é documentar toda unha rede de hospitais de peregrinos na área costeira da Mariña, desde o de Ribadeo até o de Santa Ana de Celeiro, pasando polo de San Martiño de Foz e o de Lieiro, en San Cibrao.

O martes, 30 de xullo, ás 20:30 na mesma Casa da Cultura, o historiador coruñés Carlos Pereira Martínez falará sobre a masonería na Mariña nos séculos XIX e XX. Pereira Martínez, unha das voces máis autorizadas no ámbito dos estudos sobre a masonería, comezará o seu percorrido pola masonería na Mariña reparando nas agrupacións de masóns que funcionaron nas últimas décadas do século XIX con diversas loxias operando nas localidades de Ribadeo, Viveiro e Mondoñedo, onde se significaría o medico e escritor Manuel Leiras Pulpeiro. Os núcleos masónicos existentes no período republicano antes de que o franquismo iniciase unha persecución  brutal do mesmo serán tamén obxecto da charla de Pereira. 

"Un século decisivo para A Mariña"

O ensaísta e investigador Francisco Rodríguez intervirá o mércores, 31 de xullo, ás 20:30, para falar sobre "O século XIV. Un momento decisivo para A Mariña". Rodríguez, autor dunha ampla produción bibliográfica no eido dos estudos sociolingüísticos, literarios e históricos, abordará os cambios que se producen na Galiza e na comarca da Mariña no contexto dos enfrontamentos da Guerra dos Cen Anos e do petrismo e o trastamarismo. A consecuencia destes feitos nacerá o Condado de Ribadeo, entregado por Enrique de Trastámara ao mercenario francés Pierre Villaines, que o apoiou na guerra contra os galegos, a revolta dos veciños de Viveiro contra o bispo de Mondoñedo e a consecución da vila de reguengo ou a clausura do porto da Masma polos Trastámara.

A clausura das XXIV xornadas correrá a cargo do antropólogo pontevedrés Rafael Quintiá Pereira, que falará o xoves 1 de agosto sobre os "Obxectos curativos e uso de amuletos na cultura popular". Fundador do Grupo de Estudos Etnográficos Serpe Bichoca e presidente da Sociedade Antropolóxica Galega, Quintiá Pereira falará sobre a antropoloxía dos obxectos curativos, como a pedra do raio, ou dos amuletos, algúns deles como o ollomao, e moi especialmente aos vinculados ao mundo do mar, ligando ao papel que cumpren na nosa cultura e na área atlántica e portuguesa.

comentarios