Un estudo pioneiro cuantifica o valor da música galega: a industria moveu 227,7 millóns en 2022

O 0'2% do PIB galego procede da industria musical que, ademais, xera o 0'3% do emprego no país. Son as grandes cifras do primeiro estudo sobre o impacto deste sector sobre a economía do país. O documento, "pioneiro" no seu ámbito, foi impulsado pola Asociación Galega de Empresas Musicais (AGEM) e foi presentado esta terza feira nunha rolda de prensa ofrecida na Cidade da Cultura, coa presenza de Patricia Hermida, presidenta de AGEM, Román Rodríguez, conselleiro de Cultura, e os autores do traballo, María Bastida e Miguel Ángel Vázquez-Taín. O estudo -que correu a cargo dun equipo de investigación da Universidade de Santiago de Compostela (USC), que solicitou datos durante dous anos- cifra o impacto da industria musical galega na economía do país en 227,7 millóns de euros e xera uns 3.250 postos de traballo. O sector da cultura, apremado pola precariedade e a falta de recursos Fragmentación e temporalidade O informe, Impacto da industria musical de Galicia: tendencias, retos e oportunidades, recolle valores de 2022 e cos resultados obtidos -mediante un proceso de investigación social e económica, mediante a sistematización de información baseada en cuestionarios cuantitativos respondidos por axentes do sector- argumenta que a Galiza se sitúa "á vangarda na valorización e comprensión deste ámbito da súa industria, así como no recoñecemento do seu valor socioeconómico e no fomento da transparencia e na visibilidade do uso eficiente dos fondos públicos". María Bastida e Miguel Ángel Vázquez Taín, autores da investigación, identifican unha industria con características similares ás definidoras do resto do tecido empresarial da Galiza, con pequenas empresas, uso intensivo do traballo autónomo e elevada fragmentación, mais cun gran potencial de crecemento e profesionalización. Porén, malia a alta temporalidade e estacionalidade no emprego, trátase dun tecido de profesionais altamente cualificados, "que exhiben unha gran implicación e un profundo compromiso coa arte, coa creatividade e capacidade de xeración de contido innovador como principais activos". O sector da cultura representa até 2,5% do PIB galego e 3% dos empregos Efecto multiplicador O informe mostra que, cun investimento público de 53,6 millóns de euros, a industria musical xera unha actividade económica de 181,6 millóns de euros, cun efecto multiplicador de 3,38 puntos. Esta actividade ten un impacto directo e indirecto sobre a economía, ao que debe engadirse o inducido sobre outros sectores que se activan arredor do mundo da música, especialmente a hostalería e o turismo. Todo isto tradúcese nunha demanda, e con ela nun incremento da produción na Galiza duns 227,7 millóns de euros, que implican unha xeración de emprego duns 3.250 postos de traballo equivalente a xornada completa en termos anuais, o que representa case que o 0,3% do total do emprego na Galiza. "Cada euro que poñen as administracións públicas, multiplícase por tres no sector", afirmou Vázquez Taín. "É unha industria con relevancia económica substancial" non só polo seu impacto directo, senón polo seu "importante papel tractor no conxunto da economía galega". Nesta liña, o estudo indica que a mobilización xera un retorno "significativo" en ingresos públicos, estimados nuns 33 millóns de euros, dos que a maior parte corrsponderían ás cotizacións á Seguridade Social. Mais unha parte deses recursos retornan á Galiza en concepto de IRPF e de IVE. En concreto, uns 6,67 millóns de euros corresponderíanlle á Galiza no marco do sistema de financiamento autonómico. A taxa de retorno ao sector público situaríase así nun 62% das axudas concedidas. O traballo tamén cifra en 6.000 os eventos musicais celebrados na Galiza en 2022, o que supuxo unha recadación aproximada de seis millóns de euros ou que a súa actividade ese ano foi cofinanciada a través de 53.696.000 euros de subvencións públicas procedentes das distintas administracións e 19.600.000 euros por patrocinios. Medran os hábitos culturais, pero mingua o investimento en cultura Vista ao futuro A panorámica xeral presenta un sector caracterizado por unha gran dependencia do sector público, polo recurso ao autoemprego, a variabilidade e a fragmentación, e no que tamén se dá unha elevada temporalidade que, xunto coas condicións laborais, son as principais preocupacións dos profesionais da música. As accións que se ven como prioritarias son o fomento de novos talentos (programas de incubación, concursos e premios para apoiar e promover novos artistas e xéneros musicais, así como o uso de plataformas dixitais e redes sociais para a súa visibilidade), a mellora das condicións laborais e a profesionalización (reforma da lexislación laboral artística, estabelecendo contratos xustos e seguridade laboral para os profesionais, e creación de programas de mentoring e formación en habilidades artísticas e empresariais) así como un maior apoio institucional e o deseño de políticas públicas que definan estratexias culturais que integren a música co turismo e outras áreas. Ademais, semella necesario sacar maior partido das infratruturas existentes -teatros, auditorios e outros espazos similares- facilitando o acceso ás artistas. Nese sentido, percíbese como perniciosa a concentración de actuacións musicais nos grandes eventos, mentres que o traballo de base enfronta cada vez maiores dificultades para presentarse ante o público. De igual maneira, o estudo incide na necesidade de estabelecer canles que permitan a promoción e a internacionalización da música galega, así como un uso extensivo da tecnoloxía. Como elemento positivo, o documento constata que a lingua e a cultura galegas son elementos cruciais para a identidade e desenvolvemento da industria musical da Galiza. O Barómetro da cultura sinala como principal debilidade o insuficiente apoio institucional A necesidade dun estudo obxectivo Patricia Hermida, presidenta da Asociación Galega de Empresas Musicais, insiste na necesidade de que o estudo fose realizado por especialistas independentes. "En gran medida, as fortalezas e as debilidades que revela o documento son as mesmas que detectabamos no sector nas reunións que mantemos de forma periódica, pero era preciso que o que nós percibimos de forma intuítiva fose cuantificado de maneira obxectiva para atopar fórmulas que nos permitan ir mellorando e estabelecer políticas públicas que respalden as melloras".