Loita Amada estrea 'Rematou o simulacro', o disco que consolida o seu son

Puntual na data anunciada no seu momento, desde esta cuarta feira está dispoñíbel nas diferentes plataformas musicais por internet, redes sociais e mesmo no tradicional formato físico en CD o novo álbum do grupo Loita Amada. Co título de Rematou o simulacro (2024), a formación creada en 2022 por Pablo Carracedo, coñecido no mundo da música como Jásper, e Nébeda Piñeiro, consolídase como un proxecto que naceu co compromiso de continuidade coa mensaxe de xustiza social e internacionalista. Tras a súa presentación con Viva a Loita Amada Revolucionaria (2022), Jásper recoñece a Nós Diario que desta vez os novos temas “recuperan o estilo de música que viña facendo eu historicamente nos grupos polos que pasei” polo que soan “máis duros” que o anterior traballo. A banda presenta, ademais, nova formación, coa destacada participación de músicos como Xiana Naval (trombón), María Prado (trompeta), Iván Barreiro (guitarra), Iván Bernárdez (baixo) e Amós Varela (batería). Nébeda Piñeiro, nesta nova etapa, mantén un papel importante en todo o que forma parte do proceso artístico, encargándose do deseño e ilustracións do disco físico. “Xa non son músicos contratados como no anterior disco, agora están completamente implicados neste proxecto”, certifica Jásper. 'Rematou o simulacro': Loita Amada lanzará o seu segundo álbum en xaneiro A dirección de Kaki Arkarazo O son de Loita Amada contou, nesta ocasión, coa dirección do músico e produtor vasco Kaki Arkarazo. “Eu xa traballara con el no primeiro disco grande de Nao, despois un segundo e mesmo había cancións para un terceiro”, recoñece o músico estradense. Esa relación artística consumouse cunha “implicación total” de Arkarazo até o punto de vir previamente até A Estrada “para pulir algúns temas”. En novembro de 2023 foi a formación galega quen viaxou até Andoaín, en Bizkaia, onde están situados os estudos Garate. “Estivemos dez días e notouse moito o seu traballo en como son as cancións, gústanos este cambio e pinta moi ben de cara o futuro”, conclúe Jásper. Temas comprometidos O álbum conta con nove pistas que Jásper explica que narran unha visión “internacionalista do que son as resistencias a nivel mundial”. O traballo que presentan ábrese cunha Intro a modo “de brincadeira con moita retranca do propio nome deste conxunto de pezas, o de facer a partir de agora o que realmente nos gusta”. Nesta peza lémbranse conflitos internacionais como o de Gaza e comeza coa voz dunha rapaza palestina para continuar con intervencións de Alexis Castillo, Arafat, Telesforo Monzón e Bautista Álvarez, entre outras. Loita Amada: nova canción protesta A segunda pista, titulada Cadáveres sen cabeza, “é un tema duro que pretende rirse do españolismo, de España como un imperio fracasado e decadente”, relata Jásper. Séguelle o tema titulado A nosa hora, un “himno á esperanza de que todo chegará” que dá paso a Conquistadores do pan, unha peza que bebe da música tradicional galega e “fala da xente emigrante en xeral, sexa galega ou do Senegal, introducindo tamén o tema palestino ou o dos gudaris vascos que loitan desde o exilio”. Os dous temas seguintes son máis íntimos. O primeiro é Perdoei, unha canción "que trata das relacións que se rompen por falta de entendemento”. Jásper conta que fixeron unha escoita previa do tema e subiron ademais vídeos ás redes sociais “tocando o corazón ás persoas que viviron este tipo de situacións”. Séguelle a pista Benditos nós, unha peza que Jásper compuxo para a súa compañeira, Olaia Maneiro, que tamén intervén. “É unha canción de amor, dese amor que dá liberdade e que é puro, todo o contrario do amor tóxico”, indica a Nós Diario o músico estradense. O sétimo tema, Otto ore, recupera unha canción italiana do século XX cantada en italiano e galego como “unha homenaxe que lle facemos á Banda Basotti”. A penúltima peza titúlase Unha revolución e non conta cunha sección de ventos achegándose á época de Jásper con Nao. “Parte da idea do libro Dhysphoria mundi (Anagrama, 2022) de Paul B. Preciado, sobre as marxinadas da periferia que están nesta etapa final do capitalismo facendo unha auténtica revolución como no caso do colectivo LGTBI+ ou as mulleres racializadas”, sinala o líder de Loita Amada. O álbum remata co tema Odio eterno ao fútbol moderno, unha canción que o estradense define como “moi hooligan” que trata de criticar “o mercado no fútbol e como algo que partiu do pobo remata por ser un negocio”. Xira e concertos en directo Loita Amada xa está a prepar unha xira de concertos para presentar o novo traballo. Con algunhas datas e lugares por confirmar, Jásper adianta a Nós Diario que se iniciará cunha “auténtica volta ás orixes” a través dunha actuación moi singular no Bar O Candil da Estrada o 3 de febreiro. “Será un concerto sen escenario, o grupo tocará á mesma altura que o público e estaremos acompañados, ademais, da banda vasca Rukula”, anuncia o líder da formación galega. Cun breve descando para a fin de semana seguinte, despois visitarán Viveiro (A Mariña), Vigo, A Guarda (Baixo Miño), A Coruña, Carballo (Bergantiños) e Lugo. Ademais, teñen previsto que a xira viaxe fóra da Galiza e, polo de agora, contan con poder visitar Bilbo (Euskal Herria) e Barcelona (Catalunya). Rock e transgresión en imaxes O novo álbum de Loita Amada conta con dous videoclips publicados nas redes sociais: Unha revolución (estreado o 23 de decembro de 2023) e Cadáver sen cabeza (presentado o pasado 2 de decembro). Ambos os dous están dirixidos por Lara Caeiro e contan coa edición e fotografía de Lorenzo Negueruela. “A idea de saír de primeiro coa canción Unha revolución foi da propia Lara Caeiro”, explica Jásper, “nós puxémoslle enriba da mesa catro cancións e escolleu encantada a proposta que partía do libro Dhysphoria mundi de Paul B. Preciado explicando que non hai nada máis transgresor que unhas octoxenarias rachen con todo o estabelecido”, engade. Loita amada: "Nos tempos actuais estase perdendo moito o sentido da concienciación e da esperanza" Unha das singularidades dos dous traballos audiovisuais, ideada tamén pola propia directora dos videoclips, foi que ambos os dous estiveran enlazados entre sí. “Lara pensou que o final de Unha revolución fora o comezo de Cadáver sen cabeza”, apunta o músico estradense a Nós Diario. Este segundo videoclip procurou ser máis “artístico” e, como explica Jásper, “non conta unha historia, a forza do vídeo está na imaxe, nas caras que aparecen e que transmiten as actrices e os actores que participan”. A música e a letra son protagonistas nunha mensaxe que o músico estradense explica como a búsqueda do riso e de "perderlle o respecto a todo o españolismo para colocalo no lugar que se merece: o do ridículo do cabreo absurdo que fan continuamento cando saben qe o seu concepto de nación está completamente morto".