Por que son tan especiais estas pezas musicais?
Primeiro, pola súa extraordinaria beleza. Bach é un compositor tan universal e tan importante para a historia da música que non mencionar os seus Concertos para violín sería un agravio tanto para o instrumento como para o compositor. Ademais, son moi importantes para a educación musical da xente nova, son unha parte básica do repertorio dos conservatorios a nivel mundial. É moi curioso porque, a pesar da súa beleza e do fundamentais que son, é moi complicado poder escoitar os tres Concertos xuntos nun só espectáculo. Eu, por exemplo, nunca os escoitei xuntos en directo. Poder facelo é un agasallo para o ouvido e unha ocasión única para desfrutar porque ademais son concertos sumamente importantes para entender a evolución de Bach.
Sen estes concertos non teríamos os que viñeron despois. Bach é dos compositores máis prolíficos, determinantes e influentes. Non teño palabras suficientes para describilo.
Por que é tan complicado escoitalos xuntos?
Non sabería dicir. Normalmente, a programación dos concertos adoita contar cun solista na primeira parte e despois unha sinfonía ou algo diferente e creo que vén por aí. Ademais, nesta ocasión estaremos tres solistas diferentes convidados pola orquestra A Clásica (Vigo), Raquel Carrera, Manuel Sabucedo e eu mesmo.
É unha oportunidade única para ver diferentes puntos de vista de violinistas. Cada un de nós xa tocara coa orquestra algunha vez, mais sempre foi por separado: é a primeira vez que imos tocar nós os tres xuntos. Persoalmente, o feito de poder volver tocar coa orquestra para min é un agasallo e desfrutar do que fan, paréceme algo impresionante e estou moi agradecido.
Como músico e docente nun conservatorio, como ve o interese pola música clásica?
A pandemia fixo estragos, mais agora estamos volvendo recuperar. Sempre hai xente interesada porque a cultura é moi importante para a sociedade. Aínda que podería estar máis promocionada e popularizada, porque na Galiza, por exemplo, só hai sete conservatorios profesionais. Baixo o meu punto de vista, tería que ser case obrigatorio que cada crianza soubese tocar un instrumento e ler música. É sumamente importante. E xustamente por iso sempre hai xente que quere aprender a tocar. E a difusión é clave, tanto por parte de orquestras, de concertos ou de solistas, como por parte das administracións e institucións. O labor que fai a orquestra A Clásica é extremadamente importante. É un fervedoiro cultural. Cando pensamos en sociedades antigas, lembrámolas pola cultura que tiveron e creo que é algo que nos caracteriza tamén a nós como sociedade occidental. Grazas ás institucións hai concertos, pero debería haber máis. Nos conservatorios ensinamos música clásica porque é a máis complexa e elaborada, leva moitos anos de evolución e eu creo que é inmortal.
Ocorre que, dependendo da época na que nos toque vivir, esa música transfórmase en música audiovisual, de concerto, gravada... Mais todas as músicas actuais beben da música clásica, incluíndo o pop ou o reguetón. O que temos que facer como músicos é achegala á xente porque o especial que ten a música clásica son os concertos en vivo.
Nós deberíamos sustentar a nosa base nos concertos con público e animar a xente a vir.
