Corenta anos de humor escénico na Mostra de Teatro de Cangas

Son xa corenta anos de comedia, de teatro que pretende facer rir, mais tamén reflexionar. A Mostra de Teatro Cómico e Festivo de Cangas celebra catro décadas cunha edición que ofrece cincuenta eventos entre representacións de sala e de rúa, coloquios, presentacións, exposicións e premios concentrados en dúas semanas, desde este domingo 25 de xuño até o vindeiro 8 de xuño. O teatro volverá ser o motor dunha vila que sempre fixo do humor -en todas as súas formas- unha ferramenta de crítica. A 40ª edición da Mostra de Cangas comezará mañá co pregón do actor Lois Soaxe e coa estrea absoluta de Entrega en man, o último espectáculo de Contraproducións, dirixido por Cándido Pazó sobre un texto de Martin McDonagh, un autor ben coñecido do público galego. Ademais da de Entrega en man, outras catro estreas absolutas terán lugar na vila do Morrazo: A mesa, un texto de Clara Gayo, Zé Paredes e Carlos Santiago dirixido por Sonia Rúa para a Escola de Teatro de Cangas; Hoxe si!, da compañía galega de clown e circo Sempre Arriba; Glamping, unha peza de teatro xestual, música, acrobacia aérea, danza e swing en clave de clown da compañía SU.MA; e Menú do día, primeira creación do colectivo #ChamizoBelloVila, que reflicte sobre as violencias que sofre o colectivo Lgtbiq+. Dúas destas estreas, Entrega en man e Menú do día son coproducións da propia Mostra, igual que ¿Qué es el agua?, peza da compañía La Soledad (Catalunya-Arxentina) inspirada na obra de David Foster Wallace que toma o mar como escenografía e como banda sonora. Representarase na contorna da Lagoa da Congorza, en Punta Balea, coa colaboración da banda de gaitas de Tromentelo e da Escola de Teatro de Cangas: un acto que servirá -seguindo a tradición reivindicativa deste festival- para reclamar a recuperación deste espazo natural. A Mostra tamén ofrece varias estreas na Galiza: El avaro de Molière que pon en escena unha vella coñecida do público cangués, a compañía Atalaya; Camino del Paraíso, dos estremeños de Guirigai Teatro, unha comedia satírica que transcorre nunha vila do Camiño de Santiago; Contracciones, de Producciones Come y Calla, explora a crecente invasión das grandes compañías na intimidade dos seus empregados; ou In petto, dos belgas de Okidok, un espectáculo de teatro xestual con ecos beckettianos. Unha comedia 'denegrida' de Martin MacDonagh abre a Mostra de Cangas Mulleres en acción A Mostra outorga este ano dous premios de honra. O Premio Xiria ao Labor Teatral desta edición será para a compañía de monicreques Tanxarina, que tamén celebra corenta anos sobre as táboas, recoñecendo a súa "longa traxectoria comprometida co teatro de títeres e de obxectos, ao que dignificaron e popularizaron cun traballo exquisito e en constante evolución". Ademais, o Premio Mulleres en Acción será para a escritora e activista feminista Amelia Tiganus "pola súa valentía, compromiso e determinación en combater a trata e a explotación sexual de mulleres e nenas". Cómpre lembrar que a Mostra de Cangas é pioneira na vindicación feminista: en 1997 a organización decidiu programar deliberadamente espectáculos feitos por mulleres. A raíz desa iniciativa, no ano 2000 xorden as primeiras xornadas "Mulleres en Acción" para reflexionar sobre a igualdade no sector escénico e comeza a aposta por aplicar á programación criterios de paridade, unha aposta hoxe consolidada e pioneira no teatro estatal. Desde 2012, ademais, entrégase o Premio Mulleres en Acción para recoñecer a traxectoria profesional, social e cultural de mulleres, colectivos ou entidades que realizan un labor artístico que supón unha contribución relevante para a implantación da igualdade de xénero. Tanxarina cumpre corenta anos facendo teatro de monicreques na Galiza Todos os teatros A Mostra, ademais, segue prestando atención a todas as vertentes do feito teatral; acompañará o teatro amador cunha exposición que celebra os dez anos do proxecto Platta (Plataforma Transfronteiriza de Teatro Amador), que estreita lazos entre compañías de Castela e León, Portugal e a Galiza; exporá os carteis das corenta edicións; presentará a Antoloxía do Teatro Galego Contemporáneo, editada en Portugal por Cena Lusófona, e a novela gráfica sobre a historia da sala Nasa O Navegante, escrita e debuxada por Tristán Ron; organizará unha charla sobre a crítica teatral a cargo de Camilo Franco; programará espectáculos con formatos especiais en espazos alternativos (Murmurios cuánticos, de Cinema Sticado, Alicia de Luzazul, Sorolla en min de Ceibe e Sorolla e a xa mencionada Menú do día), ou apoiará a autoría coa celebración do VII Torneo de Dramaturxia da Galiza, unha iniciativa pioneira que, en colaboración coa Asociación Galega de Dramaturxia, tenta visibilizar o traballo das persoas que escriben teatro na Galiza. Unha antoloxía achega a dramaturxia galega das últimas décadas a Portugal O Torneo de Dramaturxia da Galiza, a autoría en primeira fila A sétima edición do Torneo de Dramaturxia da Galiza significa a consolidación definitiva dunha iniciativa que naceu coa vontade de "mellorar, defender e velar polas condicións laborais das e dos profesionais do sector e visibilizar a dramaturxia galega na sociedade". O público asiste a catro lecturas dramatizadas, interpretadas por actrices e actores profesionais de recoñecido prestixio, e vota os textos que máis lles teñan gustado para que, de entre as catro pezas participantes, resulte unha gañadora. Un espectáculo teatral, que se ve dinamizado pola participación activa do público. Este ano, coa xa tradicional presentación de Esther Carrodeguas, as autoras participantes serán Deborah Vukusic, Ana Abad de Larriva, Manuel Cortés e J. L. Baños de Cos. Mulleres en acción: Vinte anos de pensamento e acción feminista en Cangas