“A retirada deste depósito, do que forman parte algunhas das máis sobranceiras expresións da ourivería máis antiga de Galiza, supón un grave menoscabo para o noso Patrimonio Cultural”, sinalan na nota de prensa do Consello Galego de Museos.
A xuntanza de responsábeis de Museos Galegos destaca tamén a “dimensión social inalienábel” do patrimonio que, ao seu ver, ten que cumprir a función e “contribuír á formación, o coñecemento e o deleite de todos os galegos”. Temen, polo tanto, polo destino non só da colección de Álvaro Gil -da que non se coñece o seu paradeiro final nin se vai estar á dispor público- e tamén das das antigas Caixas de Aforros. Diante desta situación, fan notar que as “institucións públicas, as entidades culturais e a sociedade civil non poden permanecer indiferentes”.
O Consello Galego de Museos fai notar tamén a “satisfacción” polo recoñecemento co Premio da Cultura Galega 2013 ao Castro de Viladonga, un dos fundadores da entidade.
