O domingo 28 de febreiro de 1962 falecía en Madrid o xornalista de Vilanova de Arousa Julio Camba. Unha efeméride que o Consello da Cultura Galega (CCG) conmemora coa posta en liña do documental O principio do mundo en Julio Camba, un audiovisual centrado nos seus primeiros anos na prensa literaria hispana. A institución tamén incorpora esta figura das letras ao Álbum de Galiza.
Sobre o documento, o vicepresidente do CCG, Xosé Manoel Núñez Seixas, destaca que “reivindicamos esta primeira etapa por ser a menos coñecida, unha etapa bohemia na que foi expulsado da Arxentina por mor do seu activismo no marco dos movementos anarquistas e que encaixa dentro das preocupacións da institución pola súa condición de emigrante e por ser un reputado xornalista”.
Dirixido e guionizado por Aser Álvarez, O principio do mundo en Julio Camba explica en 25 minutos como foi a forxa do xornalista de Vilanova, a súa infancia e “esa primeira formación política, vital e humana tanto na Galiza como en Bos Aires”. “O seu primeiro achegamento ás américas é un aspecto moi descoñecido da súa biografía” explica Aser Álvarez.
O traballo remata no momento en que Camba regresa de Arxentina e se instala en Madrid, onde comeza a súa carreira como xornalista, aínda que os seus primeiros pasos no mundo do xornalismo teñen lugar en Bos Aires.
O audiovisual incide tamén noutros aspectos da personalidade de Julio Camba, como a independencia, o individualismo que mantivo ao longo da súa vida, e a súa orixinalidade. O director do traballo afirma que “mantivo un espírito aventureiro, non era nada acomodaticio e estivo sempre caracterizado polo seu sentido do humor, a súa retranca e a súa ironía”.
Para trazar os inicios de Julio Camba, o documental conta coa participación dos historiadores Ramón Villares e Xosé Manoel Núñez Seixas; coas achegas de dous dos biógrafos do autor, Pedro López e Benito Leiro; e da escritora e tamén xornalista Rosa Aneiros, ademais botar man da presenza de veciños que o coñeceron na súa vila natal.
Aser Álvarez, responsábel de Arraianos Producións, asina tamén a biografía sobre a figura de Julio Camba que se incorpora, tamén desde este domingo, ao Álbum de Galiza do Consello da Cultura.