Cariño mantén unha das mostras de teatro máis antigas do país

A Mostra de Teatro Galego de Cariño chega este ano á súa cuadraxésimo quinta edición. A Mostra comeza esta tarde coa entrega do Premio do Público Infantil de 2022 á compañía Teatro del Andamio pola obra A nova historia da cigarra e da formiga, e desenvolverase na vila do Ortegal até o vindeiro día 18. as representacións comezan esta mesma tarde co espectáculo itinerante Mezzo. O fantástico circo de insectos xigantes do doutor Mezzo, de Pistacatro, a productora de circo máis relevante da Galiza. A Mostra de Cariño, unha das máis antigas do país, ten pasado por moitas vicisitudes, mais logrou sobrevivir a todas elas e manterse como unha das principais citas da programación teatral do verán. Circo, humor e maxia toman as rúas de Vilagarcía Teatro de rúa, familiar e de sala Igual que en pasadas edicións, a Mostra de Cariño presenta unha primeira fin de semana centrada no teatro de rúa, para pasar despois a programas nas que se dedica a tarde a teatro familiar e a noite, a funcións de sala para adultos. O sábado 12, a compañía brasileira Circo no Ato presentará o seu espectáculo Se der corda. En poucos anos, o Circo no Ato consolidouse como unha das máis celebradas compañías de circo no Brasil. Circo no Ato xirou por Rio de Janeiro e Brasilia, percorreu cidades con pouco acesso á cultura e barrios da capital fóra do eixo Centro-Zona Sul. Participou en diversos festivais internacionais e recibiu o premio Viva a Arte!, que lles permitiu presentarse na Galiza. O domingo 13, o programa anuncia un concerto familiar a cargo de Uxía Lambona e a banda molona e o espectáculo Greed, da compañía etíope Kiné Circus, que tamén estará no festaclown de Vilagarcía. O espectáculo é unha reflexión sobre a avaricia da sociedade de consumo e os efectos que causa. Xa na segunda feira, día 14, continuará o teatro para familias con Xela contra o dragón Traga, de Títeres Cachirulo, para dar paso á noite á N.E.V.E.R.M.O.R.E., da compañía Chévere, un exitoso espectáculo sobre todo o que rodeu o naufráxio do Prestige, convertida "nunha metáfora estrañamente perfecta desa cultura do petróleo que nos impide ver que hai máis alá da catástrofe", explica a compañía. O día 15 o programa volve ser duplo: a compañía Fantoches Baj presenta o espectáculo familiar Pedro e o lobo pola tarde, mentres que á noite, PT Excéntricas, baixo a dirección de Quico Cadaval, presentará O auto do Castromil, a obra gañadora do III Certame Manuel María de Proxectos Teatrais, que fai un repaso pola historia da Galiza a través dunhas derrotas que tamén son exemplo de dignidade e que homenaxea o teatro da década de 1970. Na cuarta feira, día 16, a sesión da tarde é para A verdadeira historia dos tres porquiños e o lobo feroz, de Teatro del Andamio. Á noite, a compañía Malasombra levará a Cariño unha obra de José Prieto, De algo hai que morrer, que se presenta como unha reflexión, non exenta de humor, sobre a morte e sobre a nosa forma de enfrontala. Ninja, de Teatro Ghazafellos, é a obra dedicada ás familias da quinta feira 17 de agosto. Á quenda a noite será para Entrega en man, unha montaxe de Contraproducións, dirixida por Cándido Pazó, que pon en escena un texto de Martin MacDonagh, un dos autores de fóra da Galiza máis representados polas compañías do país. Finalmente, na sexta feira, 18 de agosto, poderá verse, á tarde, Hugo, de Os Náufragos Teatro, obra galardoada este ano como mellor espectáculo para a infancia nos Premios María Casares,e como Espectáculo Fetén 2022. Hugo conta a historia dun neno diferente, diagnósticado cun TEA, trastorno del espectro autista. Dirixida por Gustavo del Río, conta coa interpretación de María Roja e Jimmy Núñez. Fechando a Mostra deste ano, a compañía ourensá Sarabela porá en escena a obra de Xosé Luis Méndez Ferrín Arraianos. O espectáculo incide en como a promesa de namoro nunha festa transfórmase nunha situación arrepiante. A obra reflexiona sobre unha concepción do pracer sexual que implica unha dominación deshumanizadora. O teatro de Manuel María viaxa en autobús da man de Quico Cadaval Unha das mostras máis antigas da Galiza A Mostra de Teatro de Cariño é unha das máis antigas da Galiza. A primeira edición tivo lugar en 1978, baixo o nome de Festival de Teatro Galego, organizada polos grupos de teatro locais Malveira e As Traíñas. Naquela primeira edición representáronse Ledaíñas pola morte do Meco, de Roberto Vidal Bolaño, a cargo de As Traíñas; O velorio, de Francisco Taxes, a cargo de Troula, da Coruña; e Laudamuco Señor de Ningures, de Roberto Vidal Bolaño, polo grupo Antroido de Santiago, liderado polo propio Vidal Bolaño. A obra de Chévere sobre o 'Prestige' rompe o silencio A sexta obra de MacDonagh montada polo teatro galego chega a Cariño Martin McDonagh (Londres, 1970) vai facendo honor ao título extraoficial de autor máis representado na Galiza. Ou case. Foi a compañía Teatro do Atlántico a que se adiantou, en 2006, representando, baixo a dirección de Xulio Lago, A raíña da beleza de Leenane, Logo virían dúas obras postas en escena por Producións Teatrais Excéntricas, en 2010 (Un cranio furado) e 2011 (Oeste solitario), dirixidas ambas por Quico Cadaval. En 2013, a compañía IlMaquinario debutaba cunha versión de O home almofada, dirixida por Tito Asorey. E, xa en 2016, era Cándido Pazó quen tomaba o relevo cunha versión de O tolleito de Innismaan. Agora, Pazó recunca con Entrega en man, que se estreou na pasada Mostra de Cangas e comeza en Cariño a súa xira polos escenarios da Galiza.