Betanzos vai ficar este ano sen a imaxe máis representativa das súas tradicionais festas de San Roque, a imaxe que se produce na noite entre 16 e 17 de agosto: o voo do globo de papel máis grande do mundo, unha tradición que ten case dous séculos de historia e do que betanceiros e betanceiras fixeron un sinal de identidade.
A Fundación Globo de Betanzos, da que fan parte o Concello e a familia Pita, confirmou nestas horas que non se lanzará este San Roque o aeróstato. Atribúe esta inédita situación ás limitacións derivadas da creación da propia Fundación, que impediron realizalo a tempo.
A Fundación Globo de Betanzos pide desculpas á cidadanía e comprométese a “que en 2024 e de aí en diante, Betanzos contará co globo de San Roque”.
Esta cancelación prodúcese após semanas de ruxe-ruxes sobre a posibilidade de que este ano o globo de papel non voase. A familia Pita é a envargada de elaborar este aparato.
En 1875 un albardeiro galego, Claudino Pita, decidiu homenaxear a festividade de San Roque construíndo un globo de papel. Desde entón, a familia Pita cumpre cada ano con esta tradición: elevar na localidade de Betanzos o aeróstato de papel máis grande do mundo.
Construción
Un a un vanse colocando os 160 quilogramos de papel até dar forma a 16 cuarteróns, pegados con ungüento especial, unha mestura a base de fariña de centeo cocida con auga que un antepasado utilizaba xa para tratar o coiro nos seus labores como albardeiro.
Na boca do aeróstato, separado tras un aro de madeira, un cesto de arame alberga outro dos segredos do aparello: un lume aceso cunha mecha mestura de palla e aceite que, debido á diferenza de temperatura, impulsa o globo "a mercé dos ventos", como deixou escrito o propio Álvaro Cunqueiro.
Desde o BNG, sinalouse que “a familia Pita, a Fundación Globo de Betanzos e o Goberno local teñen a obriga de explicarnos a todas as veciñas e veciños porqué este ano non imos ter globo, agardamos que se encontre unha solución a esta situación “.
