“Semella que unha neoinquisición anda á espreita, violando e atentando gravemente contra dereitos e liberdades tan básicas como a de expresión ou de lingua”, sinala o documento da AELG, para a que os feitos constitúen un “furibundo ataque á liberdade individual” especialmente grave por se tratar do carnaval: “Unha catarse liberadora para compensar carencias de liberdade, que boa falta nos fai, como demostran certos ataques retrógrados aos dereitos máis elementais”.
No pregón, Carlos Santiago (Compostela, 1966) fixo un dos seus personaxes máis emblemáticos, unha parodia do Apóstolo Santiago. Uns días máis tarde, o xornal local El Correo Gallego -obxecto dalgúns dardos satíricos do pregón- iniciou unha campaña contra a súa intervención baseada en dubidosas fontes, dado que non lles constaba o texto nin as gravacións da alocución.
“Someter, porque este é o verbo auténtico, a liberdade de expresión de cómicas e artistas é o que se pretende con esta campaña de acoso a Carlos Santiago como pregoeiro do entroido en Compostela”, afirma a asociación. A AELG “rexeita os ataques contra esta liberdade esencial, que forma parte da nosa tradición cultural, e as críticas inxustificadas sobre o un pregón de entroido” e faise eco do manifesto da Asociación Galega de Dramaturxia, a que considera inaceptábel “este inxustificábel ataque violento á persoa de Santiago”.
De Portugal
Mais a solidariedade con dramaturgo e poeta excede o territorio galego. Un cento de autoras, autores, actrices, actores, portugueses promoven o manifesto Do mundo cultural e teatral português solidariedade com Carlos Santiago. “É intolerável a cruzada da nova inquisição que, depois do pregão de entrudo, se tem abarricado contra o pensamento livre de um cidadão fraternal e socialmente interventivo, dramaturgo é homem de teatro”, afirma, “associamo-nos a todos quantos sabem o valor da liberdade de expressão, o pensamento livre e o exercício artístico sem mordaças”.
O documento para nos vínculos de Santiago con Portugal: “Carlos Santiago é estimado em Portugal não por dizer ou expressar o que os portugueses querem, mas por ter um pensamento próprio que dignifica os seres humanos [...] é, por natureza do seu carácter, um rei do entrudo, manifestação que, para bem da humanidade, não obriga a seguir a 'voz do dono' nem as amarras de qualquer poder”.
“Mais do que estar solidário com Carlos Santiago, importa afirmar o direito à liberdade de expressão e desmascarar uma estratégia política-religiosa ditatorial que quer crucificar quem não segue o seu ku klux klanismo. Perante estas novas cruzes gamadas, qualquer um de nós é Carlos Santiago, pela ameaça que representam para a liberdade de expressão e direito a exprimirmos a nossa opinião”, conclúe.
Entre as sinaturas -aínda en proceso de recolla-, figuran o escritor Rui Zink, a antropóloga Paula Godinho, os dramaturgos Helder Costa ou José Rui Martins, compañías como Trigo Limpo, A Barraca de Lisboa, Leirena ou Onomatopeia, e outras e outros.
