A Real Academia Galega de Ciencias (RAGC), coa colaboración da Axencia Galega de Innovación (GAIN), vén de convocar a oitava edición dos Premios á Transferencia de Tecnoloxía na Galiza.
O galardón ten por obxectivo "recoñecer casos de éxito en transferencia de coñecemento e difundilos entre a cidadanía", e está destinado a persoal investigador e empresas do país "na súa faceita máis aplicada e de transferencia de coñecemento".
Os Premios á Transferencia de Tecnoloxía recoñecen desde 2015 as mellores prácticas de transferencia de coñecemento procedentes de organismos de investigación ao tecido produtivo, e destacan proxectos centrados nos campos da biomedicina, farmacolóxica, tecnoloxías TIC ou traballos sostibles nos sectores agroforestal e agroindustrial, todos eles liderados por grupos de investigación de todo o país.
Tres categorías
Nesta nova edición, o galardón divídese en tres categorías. Así, o premio 'Francisco Guitián Ojea' distinguirá un traballo de investigación aplicada para recoñecer a creación, a cargo dun grupo de investigación, dunha tecnoloxía aínda non transferida e da que se deriven claras aplicacións para o desenvolvemento socioeconómico da Galiza.
O premio 'Fernando Calvet Prats' destacará un caso de éxito de transferencia de tecnoloxía promovido por un grupo de investigación, froito da colaboración cunha empresa. Irá destinado ao grupo de investigación creador da tecnoloxía transferida.
E, por último, o premio 'Ricardo Bescansa Martínez' galardoará un caso de éxito empresarial de implantación de tecnoloxía transferida, froito da colaboración cun grupo de investigación galego. Irá destinado á empresa que implantase con éxito a tecnoloxía transferida. As tres categorías están dotadas de cadanseu premio de 6.000 euros e un diploma acreditativo.