O pasado 20 de marzo, cun amplo consenso do sector cultural galego, a Xunta recibiu un documento de 15 páxinas cunha serie de propostas "concretas e asumíbeis" para superar estes momentos de crise, que aínda non viu resposta ningunha, após finalizar a rolda contactos sectoriais, algúns deles mesmo "en dúas ocasións", denuncian as entidades asinantes, representativas do conxunto da cultura galega. O único anuncio foi un plan de préstamos do Instituto Galego de Promoción Económica, común para toda a economía.
- Reprogramar o Xacobeo 2020 e 21 para o fortalecemento real da Comunidade Cultural Galega
- Crear a Receita Cultural para garantir o acceso á Cultura de toda a poboación, incluida a máis afectada pola crise económica.
- Adaptar todas as convocatorias de subvencións e bolsas culturais á realidade actual.
- Compromiso por parte de todas as administracións galegas da execución do 100% do orzamento destinado á programación e actividade cultural no 2020.
- Compromiso da non cancelación de ningún proxecto cultural, incluídos os formativos que sexan viábeis online, que xa estaban aprobados.
- Ampliar ata marzo 2021 os ciclos de programación 2020 e anticipar un mínimo do 50% dos caché na data prevista inicialmente.
- Posibilitar a contratación de actividades e actuacións en streaming e formato audiovisual pregravado.
- Novas liñas de axudas para a creación, investigación e preprodución para proxectos futuros nos espectáculos ao vivo e na xestión cultural.
- Axudas para publicacións de arte e revistas dixitais para impedir o colapso do sector.
- Redefinición do plan estratéxico para o sector cultural a medio prazo, dentro e fóra do país.
- Recoñecemento do libro galego como "estratéxico e prioritario"
- Reparto equitativo e accións dentro do plan de urxencia de 25 millóns de euros anunciado para o sector “cultural e turístico”.
- Implicación da Radio e Televisións de Galicia con múltiples contidos que representen a todo o sector cultural galego nas súas programacións con orzamento definido e específico.
- Elaboración dun plan de profesionalización do sector cultural e a loita contra a precariedade
- Atención ao colectivo de mulleres do sector da arte contemporánea (tanto de artistas como críticas, galeristas, comisarias…) así como as xestoras culturais e persoal técnico que, unha vez máis, están a ter que conxelar as súas carreiras para asumir os coidados.
Consideran ademais fundamental a creación dunha Comisión de segueminto do plan adoptado.