Tomates vermellos secos e algo máis

—Paté vegano de tomates secos Esta receita é unha alternativa vegana e saborosa aos patés tradicionais. Elaboración: Comezamos botando todos os ingredientes no vaso dun batedor e trituramos até que fique unha mestura homoxénea e sen gromos. Botámoslle comiño en po ao gusto e servímolo nun cunco acompañado de anaquiños de pan torrado para untar ou con nachos para mollar nel. Podemos conservalo na neveira durante varias semanas se o gardamos nun tarriño. —Pan bao con polo asado, tomates secos e spicy mayo Que os pan bao están de moda non é ningún segredo, imos ver como se fan para aproveitar as sobras de polo asado. Elaboración: Comezamos preparando o pan. Para iso mesturamos un chisco de sal coa fariña e desfacemos o lévedo na mestura. Facemos un burato no medio e imos botando a auga morna pouco a pouco mentres mesturamos. Botámoslle un chorriño de aceite e amasamos coas mans, se vemos que se nos pega engadimos un pouco de fariña e seguimos amasando e se pola contra ficou moi dura engadimos un pouco de auga, dependerá do tipo de fariña que empreguemos. Despois de amasar durante 10 minutos formamos unha bola e deixamos repousar 2 horas cuberta cun pano húmido. Pasado este tempo dividimos a masa en 4 boliños e deixámolos levedar outros 20 minutos, tamén cubertos cun pano húmido. Despois de que leveden, estendemos un pouco os bolos cun rolete para darlles forma ovalada, colocamos un anaco de papel de forno no medio para evitar que se peguen e dobramos pola metade. A continuación colocamos os pans nunha vaporeira cun anaco de papel de forno por baixo e deixámolos repousar outros 30 min. Cando remate o último levedado xa podemos cociñalos, para iso colocamos a vaporeira sobre unha pota con auga fervendo e deixamos 15 minutos coa vaporeira tapada e outros dous sen tampa. Deixámolos arrefriar un chisco e xa podemos enchelos do que máis nos guste. Neste caso empregamos peituga de polo asado esfiañada, tomates secos, eiruga, cebola morada e spicy mayo. —Torradas acarameladas Para a sobremesa eliximos unhas torradas moi saborosas e cun toque crocante. Elaboración: En primeiro lugar mesturamos nunha pota a nata co leite, o azucre e unha culleriña pequena de extracto de vainilla, remexemos mentres agardamos a que ferva e deixamos arrefriar uns minutos. A continuación batemos os ovos e as 2 xemas, engadímoslles pasando por un coador o leite infusionado e mesturamos ben cun batedor de globo. Colocamos nunha bandexa grande as rebandas, botamos por enriba a mestura anterior e deixamos que se enchoupen ben durante un mínimo de 4 horas, o ideal é facelo dun día para o outro. Para fritilas botamos manteiga nunha tixola e pasámolas polos dous lados até que fiquen douradiñas. Á hora de servir cubrímolas cun pouco de azucre moreno e acaramelamos coa axuda dun soprete, podemos tamén decoralas con froitas por enriba.