En inverno pero de temporada

Aínda que o inverno sexa unha época na que a natureza está durmida por causa do frío e temos menos froitos, hai unha chea de produtos de temporada que podemos aproveitar. Da horta Na horta durante a época de frío viven o seu esplendor as alcachofas, os porros, as espinacas e toda a familia das coles, como a coliflor, o repolo, o brócoli e tamén os grelos, tan populares no noso país. Todas estas verduriñas son ideais para elaborar cremas ou caldos que tan ben veñen para entrar en calor durante o inverno. Déixovos algunhas ideas máis para que gocedes delas. As alcachofas podemos consumilas crúas, asadas ou cocidas. O xeito máis sinxelo de cociñalas é asándoas, para isto cortámoslles o talo, adobámolas con sal, pementa e aceite e metemos no forno durante unha hora máis ou menos. Tamén podemos cocelas ou saltealas xunto cos ingredientes que máis gostemos, por exemplo con taquiños de xamón e nata. Sexa da forma que sexa, como primeiro prato ou como acompañante para calquera carne ou peixe son estupendas. Os porros son xeniais para todo tipo de cremas, pero hai dous pratos nos que son realmente protagonistas. O primeiro é a porrusalda, un caldo de porro de orixe vasco que leva tamén patacas, cenorias e ás veces tamén bacallau. O segundo é a vichyssoise, unha sopa de sona internacional e que provén dunha receita tradicional francesa. Pódese tomar fría ou quente e elabórase con porros, patacas, caldo de polo e nata ou leite evaporado. Cocíñase ben todo e logo tritúrase para dar lugar a unha crema fina. Na Galiza o máis común é comer os grelos no cocido ou con lacón, pero temos mil maneiras de desfrutalos: en croquetas, na pizza ou incluso como recheo dunha lasaña. A miña proposta é unha lasaña vexetariana feita a base de grelos e cabaza asada. As espinacas ao igual que os grelos son un vexetal moi versátil, pero son moito máis sinxelas de cociñar, podemos comelas incluso crúas. En sopas ou cremas están xenial, mesturadas con queixo para facer mollo para a pasta ou en revoltos tamén son estupendas. Só temos que botalas nunha tixola cun chisco de aceite e outros ingredientes para gozar delas. Combinan especialmente ben con froitos secos e tamén con legumes como lentellas ou garavanzos. Os garavanzos con espinacas son unha receita tradicional de Andalucía. Para preparalos salteamos as espinacas frescas nun pouco aceite con allo, engadimos pemento moído e cando estean case feitas botamos os garavanzos cocidos e seguimos salteando uns minutos máis. Verduras como a coliflor ou o brócoli tendemos só a comelas cocidas, pero por exemplo se as relamos podemos facer cuscús con elas ou mesmo a base dunha pizza. Outra alternativa igual de vistosa e moi saborosa é asala no forno acompañada con queixo e especias como o curry. Do mar Ao igual que cos produtos da horta, tamén temos que apostar nun consumo sostíbel de peixes e mariscos. Ademais de consumir produtos de proximidade e que foran pescados con artes respectuosas tamén é importante mercar peixe de temporada. Nesta época atoparemos na peixaría bivalvos como a ameixa ou os mexillóns, ou peixes como o ollomol, a xarda, a dourada, a pescada, a sardiña ou o sargo. Tamén estamos no tempo de consumir o polbo e os chocos. Hai milleiros de xeitos de cociñar estes peixes e mariscos: guisos como o marmitako de atún, en mollo verde como as ameixas ou a pescada e ao vapor con limón como os mexillóns. Unha das maneiras máis sinxelas e que mellor resultado dá ao cociñar o peixe é ao forno. Só precisamos facer unha cama de patacas e cebola e colocar o peixe salpementado sobre ela cun chorriño de limón por enriba. Metémolo no forno o tempo que precise e cando remate teremos un manxar. Os máis doces Algunhas das froitas que se resisten ao inverno son os cítricos, como os limóns, as laranxas ou as mandarinas. Son coñecidos por ser unha gran fonte de vitamina C e outros nutrientes moi beneficiosos para a nosa saúde. Co dobre de vitamina C que unha laranxa pero máis famoso pola fibra que nos aporta temos o kiwi, que tamén está de temporada nesta época do ano. Esta froita dáse moi ben no noso país, e en poucos anos a Galiza converteuse con gran diferenza no maior produtor do Estado. O plátano a diferencia das anteriores recóllese todo o ano pero é necesario importalo, a maioría dos plátanos que consumimos veñen das Illas Canarias. As froitas son moi recorrentes na repostaría, unha das sobremesas máis sinxelas con froitas é unha tortaleta. Faise cunha base de masa follada e con crema pasteleira por enriba. Agora só temos que colocar por enriba as froitas de temporada das que máis gostemos cortadas en anacos, neste caso eu acompañeina de mandarina, plátano e kiwi. Outra preparación que tamén podemos facer con plátanos é o famoso banana bread ou pan de plátano, un biscoito ao que se lle engade a froita á masa e que é estupendo para aproveitar os que se poñen feos no froiteiro, podemos engadirlle anacos de chocolate tamén para acabar de gozalo. Este é un resumo dos produtos de temporada que temos durante o inverno. Consumindo conscientemente ademais de reducir o impacto ambiental que supón o transporte desde a outra punta do planeta, obtemos un maior sabor e polo xeral tamén un prezo menor. Deste modo todos e todas saímos gañando!