O monte gaña terreo na Galiza mentres cae a superficie agraria útil. O proceso iniciado tras a incorporación do Estado español ao Mercado Común Europeo agudízase, até o punto de que Galiza é a comunidade con máis superficie agraria abandonada. Así o reflicten os datos que vén de publicar o Ministerio de Agricultura.
A Xunta da Galiza vén dar por extinguido o incendio forestal que arrasou 2.326 hectáreas de monte nos concellos de Ribadeo e Trabada, ambos na comarca da Mariña. O fogo, cualificado polo Goberno galego como o máis grande do ano no país, eleva a superficie queimada neste exercicio a perto de 17.000 hectáreas.
A caída da superficie agraria útil favorece o incremento da superficie forestal. A día de hoxe, 33,3% da superficie forestal da Galiza está ocupada polo mato, que supera a superficie cultivada ou a extensión total de prados e pasteiros. O seu avance é consecuencia do abandono rural.
A superficie forestal galega suma perto de dous millóns de hectáreas e representa 60,8% da extensión do país. Segundo os datos achegados polo Inventario Forestal Nacional, 598.322 hectáreas atópanse ocupadas polo mato. O abandono do monte é un dos principais factores de risco para os incendios.
