A Casa Museo Manuel María será, un ano máis, epicentro do Convivio da Cultura Galega. Asociacións culturais de todo o país, activistas, afeccionados e militantes achegaranse o sábado, 13 de xullo, a Outeiro de Rei para celebraren o poeta da Terra Cha e o traballo popular, de base, pola cultura.
Apatacón é a compañía musical e teatral que Faia Díaz -coñecida polo seu labor vocal en Coro do Encaixe ou De Vacas- e a contadora Vero Rilo puxeron en marcha coa idea de “investigar os límites e puntos de encontro das súas disciplinas”. O sábado 18 de maio amosarán algúns dos seus resultados na casa museo Manuel María, de Outrieo de Rei.
Trece cancións bonitas pesca melodías en clásicos avanzados -Erik Satie-, en autores do canon europeo -Schubert- ou en instrumentistas virtuosos -Galliano-. A maiores, inclúe composicións propias. Propias dos músicos Germán Dáz e Benxamín Otero, argallantes do sutil, “ecléctico e accidental” proxecto. O sábado 27 de abril lévano á Casa Museo Manuel María de Outeiro de Rei.
O libro Bailar nas nubes, de Vanina Starkoff, sérvelle á contadora Soledad Felloza de base do seu novo espectáculo de narración oral, titulado do mesmo xeito. Ofrecerao este sábado, 13 de abril, na Casa Museo Manuel María de Outeiro de Rei, a partir das seis da tarde.
“Potenciar a expresión oral e a creatividade do alumnado a través do coñecemento e o recitado da poesía en galego de Rosalía de Castro e da ampla obra poética de Manuel María” é o obxecto do concurso Rosalía Sempre Viva, que este sábado 6 de abril acolle a súa fase final na Casa Museo Manuel María en Outeiro de Rei.
“A historia de centos de mulleres que cambiaron por completo a organización social de toda unha comarca no inicio do século XX en Galiza”. Sobre estes sucesos trata o documental Tecido Resistente, de Marina Chiavegatto, que se proxectará o sábado 9 de marzo ás oito do serán na Casa Museo Manuel María de Outeiro de Rei.
Na Maleta da avoa viaxan contos, lendas, monicreques, obxectos. Transpórtaa Raquel Queizás e este sábado, 16 de febreiro ás 18.00 horas, levaraa á Casa Museo Manuel María.
Verbas de Auga é o espectáculo que a cantautora Paloma Suanzes presentará o vindeiro 9 de febreiro, sábado, na Casa Museo Manuel María, en Outeiro de Rei. Será ás oito do serán e con entrada de balde.
O documentario Vértice de versos (2018), dirixido por Carlos Lorenzo, aborda como nunca antes se fixera desde o ámbito audiovisual a última poesía galega. Este sábado 8 de decembro proxéctao a Casa-Museo Manuel María de Outeiro de Rei.