mércores 25/11/20

O xulgado condena o Grupo Hotusa por vulnerar a súa liberdade sindical e obrígaa a readmitir dous traballadores

“A xustiza considera que non existe causa obxectiva dos despedimentos e que o único fin do Grupo Hotusa era eliminar o persoal sindicado e máis activo”, indica a CIG.

Instalacións de Hotusa en Chantada (Cedida)
Instalacións de Hotusa en Chantada (Cedida)

O Xulgado do Social nº3 de Lugo vén de condenar a H24 Reservation Services e Agate Hotels SL (do Grupo Hotusa) a readmitir de inmediato dous traballadores “aos que despediu en represalia pola súa filiación sindical e pola súa proximidade coas do persoal”, segundo informa a CIG a través dun comunicado.

A xustiza considera, indica o sindicato, que non existe causa obxectiva dos despedimentos e que o único fin do Grupo Hotusa era eliminar o persoal sindicado e máis activo, xa que ademais destes dous traballadores a empresa tamén despediu a varios delegados e outras persoas afíns á CIG.

Para xustificar a extinción do contrato, a filial de Hotusa acusa os traballadores de baixo rendemento voluntario para aplicarlles así un despedimento disciplinario. Porén, nas dúas sentenzas sublíñase que "fronte ao indicio de vulneración do dereito de liberdade sindical non existe xustificación obxectiva e razoábel da decisión adoptada pola empresa".

Aínda máis, nunha das resolucións xudiciais insístese no feito de que estes dous traballadores foron os únicos que se atreveron a sentar na mesa dos representantes sindicais durante a cea de Nadal e que ambos os dous foron despedidos.

Para o secretario comarcal da CIG de Lugo-A Mariña, Antonio Niño, fica claro que a decisión de despedir estes traballadores “forma parte da estratexia de persecución sindical iniciada pola compañía contra da CIG tras gañar as eleccións sindicais celebradas o pasado ano no centro de traballo de Chantada”.

Non hai que esquecer que, prosegue, “pouco antes de declararse o estado de alarma en marzo, a empresa aplicou despedimentos moi selectivos, xa que na meirande parte afectaron a persoas que a empresa vincula coa CIG, pero que pretendeu camuflar baixo a escusa da baixada das reservas e as cancelacións provocadas pola Covid19”.

comentarios