Vitrasa, a concesionaria do transporte urbano do Concello de Vigo, e os sindicatos que representan o groso do persoal veñen de alcanzar un preacordo para desconvocar a folga indefinida que inclúe subas salariais, após numerosas protestas e paros decorridos nas últimas semanas.
Segundo fontes do comité de empresa, após unha "intensa" xornada de negociacións, esta quinta feira chegouse a un preacordo para suspender o paro, que comezou a finais do mes de novembro. Con todo, cabe esperar a que este acordo sexa ratificado polos empregados, o que previsibelmente acontecerá esta sexta feira.
Este pacto incluiría para o ano 2023 unha suba de soldo de 2,5%, actualizando as táboas do 2024 e cobrando os atrasos. Tamén se chegou a un acordo na nocturnidade de talleres, cambios de quendas entre compañeiros e melloraranse os descansos entre paradas.
Se os traballadores desen o visto e prace, desconvocaríase a folga, co compromiso de que en tres semanas prodúzanse máis avances na negociación do convenio colectivo, caducado desde finais de 2020. Ademais, solicitarase ao AGA a súa participación no calendario de reunións, cun ou dous encontros por semana.
O presidente do comité de empresa, Imanol Arnoso, puxo en valor este principio de acordo, que terá que ser validado en asemblea de traballadores. En declaracións á axencia Europa Press, dixo que a partir de aquí poderase continuar negociando o convenio colectivo, pero a folga quedará desconvocada.
