Un traballador foi trasladado este sábado nun sinistro laboral tras sufrir unha caída de altura en Moraña (comarca de Caldas), desde o silo ao que se subiu, a uns dous metros de altura, sufrindo lesións nas pernas.
Pouco despois das 14:30 horas, o 112 Galicia recibiu o aviso do accidente. O mesmo implicado explicaba que caera ao chan desde unha altura, nunha empresa de madeiras situada na parroquia de Laxe (Moraña).
Desde Urxencias Sanitarias de Galicia-061 comunicaban a saída do helicóptero medicalizado con base en Santiago, que chegou a tomar terra no lugar dos feitos.
Con todo, unha vez finalizada a intervención, os membros da Agrupación de Voluntarios de Protección Civil de Moraña confirmaban ao 112 que o ferido foi trasladado en ambulancia.
As estatísticas facilitadas polo Ministerio de Traballo e Economía Social, realizadas con carácter bimensual, indican un incremento de 17% dos accidentes de traballo no período que vai de xaneiro a setembro de 2022 -respecto ao mesmo período de 2021-, lonxe por tanto do aumento que ten o conxunto do Estado español (13,3%) e á cabeza dunha listaxe na que tamén figuran Murcia (16%) e o País Valencià (14%).
Na Galiza, durante eses meses, tiveron lugar 20.919 accidentes. Deles, 20.541 foron leves, 320 graves e 58 remataron co resultado de morte (52 durante a xornada laboral e seis fóra dela). A cifra de falecementos, sen rematar o ano, é a máis alta desde 2016, cando morreron en accidente laboral 63 persoas.
Outro dato a ter en conta é que a maior parte das persoas accidentadas eran asalariadas, 19.344, fronte ás 1.575 que eran autónomas. A incidencia da Covid-19, introducida nas estatísticas coa chegada da pandemia, case non influíu este ano nas baixas laborais que, até setembro, foron 67.
