A Autoridade Independente de Responsabilidade Fiscal (AIReF), organismo creado polo Goberno español para garantir a estabilidade financeira do Estado, advertiu esta cuarta feira de que a taxa de desemprego oficial cada vez "é menos representativa do que se quere medir", afirmou a súa presidenta, Cristina Herrero. Esta taxa non inclúe, por exemplo, algúns traballadores e traballadoras a tempo parcial que queren traballar un maior número de horas, e tampouco os desocupados non inscritos no paro pero que desexan traballar.
Estes dous colectivos constitúen a chamada poboación "infrautilizada". Unha das métricas apunta a que a porcentaxe desta poboación no Estado español alcanza 18%. Ademais, o organismo independente percibe dificultades para medir o tempo de emprego efectivo ante o cambio do comportamento no mercado de traballo que se observa xa desde antes da reforma laboral.
Por este motivo, instoa a prestar atención a métricas alternativas que se utilizan xa na UE e incluso nos Estados Unidos de América para "analizar un mercado laboral cambiante en todo o mundo".
Ante un "entorno tan volátil", a AIReF considera que cada vez faise máis necesario dispor de información de alta frecuencia para medir a evolución da situación económica e os cambios de comportamento que se están a rexistrar, por exemplo, no mercado do traballo.
Afiliación "excepcional"
A AIReF considera "moi informativo" o dato ofrecido a metade de mes pola Seguridade Social sobre a evolución da afiliación. Así, afirman que o mes de marzo será excepcional. Porén, cren que se debería facer un esforzo para medir as horas traballadas, xa que percibe dificultades para medir o tempo de emprego efectivo ante os cambios que se observan nos datos de emprego desde antes da reforma laboral.
