As taxas de emprego máis baixas para as persoas recentemente tituladas en Formación Profesional rexistráronse en xeral nas rexións do sur da Unión Europea. O Anuario 2022 de Eurostat constata tamén aquí unha fenda entre o centro e mais norte europeo a respecto do sur.
"En 2021, había 19 rexións europeas nas que menos de 57,5% de todos os graduados atoparon traballo", indícase neste documento da UE. Desas 19 rexións, 10 están en Italia, cinco en Grecia, dúas na Francia, unha en Romanía (Sud-Vest Oltenia) e outra no Estado español: a Galiza.
As taxas de emprego rexionais máis baixas de titulados rexistráronse en tres territorios italianos: Calabria (33,8%), Campania (31,8%) e Sicilia (27,1%). O extremo contrario é na Alemaña e Suecia, onde en varias das súas rexións "todas as persoas tituladas recentemente [en Formación Profesional] atoparon traballo".
O obxectivo: 82%
Unha recomendación do Consello de Europa sobre a educación e formación profesional (EFP) estabeleceu un valor de referencia da Unión Europea para os titulados e tituladas recentes de programas de FP.
O obxectivo definido por Bruxelas en relación coas persoas de 20 a 34 anos que obtiveran un título de ensino secundario superior ou postsecundaria de FP é que a taxa de emprego desta faixa de poboación sexa no mínimo de 82% en 2025. Así, a Galiza tería apenas dous anos para chegar a ese 82% de taxa de emprego, partindo de que en 2021 non alcanzaba 57%.
Universidade
O estudo da situación dos egresados universitarios que fixo a Axencia para a Calidade do Sistema Universitario da Galiza (Acsug) indica que 79,3% delas buscou emprego e, dentro deste grupo, 80,4% atopouno cando menos no período posterior de cinco anos. A mostra para o estudo foi de 5.163 titulados.
200 millóns de euros menos ao ano pola 'fuga de talentos'
A Galiza perde máis de 200 millóns de euros cada ano pola fuga de talentos. A saída migratoria da mocidade en busca de oportunidades laborais é un feito que continúa a marcar o presente e o futuro económico da Galiza. Un documento presentado polo Foro Económico da Galiza —Fuga de talento na Galiza. Mito ou realidade?— afonda nesta realidade. Realizouse a partir da información do capital humano de entre 18 e 44 anos cunha formación importante en estudos universitarios nas últimas décadas.
Segundo o informe, a partir dos supostos recollidos no traballo, a Galiza incorrería anualmente nun custo por formar tituladas e titulados que emigran fundamentalmente por cuestións laborais de, como mínimo, 178 millóns de euros ao ano. supondo que o alumnado terminase a súa formación en catro anos, cantidade que se amplía aos 311 millóns se a remataron en sete anos.
Ademais, este proceso migratorio suporía unha perda de nacementos anual de 1.500 nenos e nenas. Así mesmo, e sempre segundo este documento, deixaríanse de crear anualmente ao redor de 315 novas empresas.
