Máis de 11.500 postos de traballo foron destruídos durante o mes de xaneiro

Segundo os datos publicados esta quinta feira polo Ministerio español de Inclusión, Seguridade Social e Migracións, a Galiza perdeu un total de 11.525 cotizantes durante o mes de xaneiro, quedándose con 1,03 millóns de afiliados, 1,11% menos que en decembro, unha caída lixeiramente superior á experimentada a nivel estatal, de 1,06%. Galiza será a única comunidade do Estado que perderá emprego en 2023 O mercado laboral galego segue así a senda negativa do mes de decembro, cando experimentou un descenso das cotizacións de 5.345 persoas, cunha baixada de 0,51%. Porén, en termos interanuais, a Galiza aumentou en 8.784 as afiliacións, unha suba de 0,86% con respecto a xaneiro de 2022. Un dato que non semella tan positivo ao ter en conta a evolución estatal, cuxo nivel de incremento das persoas cotizantes nos últimos 12 meses foi de case o triplo que o galego ao alcanzar unha taxa de 2,3%. Por réximes, 806.574 persoas afiliadas na Galiza pertencía ao réxime xeral (-1,17% con respecto a decembro), 204.964 traballaban por conta propia (-0,62%) e 19.200 estaban anotadas ao réxime do mar (-3,64%). Por outra parte, as persoas que se atopan en expedientes de regulación temporal de emprego (ERTE) por causas económicas, técnicas, organizativas ou de produción (ETOP) no país eran 920. Sobe o desemprego O número de persoas desempregadas rexistradas na Galiza nas oficinas dos servizos públicos de emprego subiu en 2.826 en xaneiro, o que supón 1,99% máis que no mes anterior, até contabilizar 145.048 desempregados. O desemprego subiu en máis de 3.000 persoas no sector servizos O ritmo de crecemento do paro no Estado español foi lixeiramente superior, medio punto porcentual maior, ao situarse en 2,5%. Non obstante, esta diferenza chega despois do maior descenso do paro a nivel estatal baixo o efecto do Nadal, xa que en decembro caera o desemprego no Estado en 8,6%, mentres que na Galiza fixérao en 6,79%. A afiliación á Seguridade Social caeu na Galiza en 5.345 persoas en decembro Segundo os datos publicados esta quinta feira polo Ministerio español de Traballo e Economía Social, nos últimos doce meses o paro baixou na Galiza en 8.884 persoas, 5,77% en relación ao primeiro mes de 2022. Unha caída interanual do desemprego que tamén é inferior á do Estado, de 6,9%. Por xéneros, 58,3% das persoas desempregadas na Galiza a finais de xaneiro era muller. Ademais, 77,9% das novas persoas desempregadas eran mulleres, polo seu maior peso nos servizos. Por sectores, 71,3% das persoas no paro corresponde aos servizos, 103.423 persoas, mentres que 3,3% pertence á agricultura, 4.809 persoas, 10,3% á industria, 15.051 persoas, e á construción 7%, 10.147 persoas. Por outra parte, 11.618 persoas desempregadas na Galiza non tivo un posto de traballo antes. Destas cifras despréndese que todos os sectores reduciron o seu número de persoas desempregadas menos os servizos, onde aumentaron en 3.100 persoas tras o fin da campaña do Nadal. En concreto, o paro na agricultura galega baixou en 9 persoas en xaneiro, mentres que na industria esta caída foi de 56 persoas e de 119 desempregadas menos na construción. Tamén 90 persoas que non tiveran un emprego antes atopárono en xaneiro. "A creación de postos de traballo vaise paralizar" O profesor de Historia Económica na Universidade de Santiago de Compostela (USC), Adrián Dios, en declaracións a Nós Diario, sinala que "os datos de emprego tenden a ser moi semellantes aos da evolución da economía mais con certo atraso". A Seguridade Social perde 1.093 persoas afiliadas no mes de novembro na Galiza Nese sentido, explica, "igual que hai uns meses nos sorprendía que se crease emprego a pesar de que a economía medrara cada vez máis amodo, o que acontece agora é que se está trasladando esa desaceleración que se empezou a dar hai tres meses ao emprego e seguramente o que imos ver nos seguintes meses é que a creación de postos de traballo se vai paralizar". Dios afirma que "a dependencia do sector servizos é algo moi relativo, pois é un campo moi amplo". A respecto diso, explica, "oxalá que o sector servizos implicará alto valor engadido, como en outros países, pois aquí homologase coa hostalaría, con menos xeración de valor". "A destrución de emprego no sector servizos vén directamente ligada a que no Nadal hai moita contratación no comercio retallista e na hostalaría", sinala. "Trátase de sectores moi estacionais, que provocan alta inestabilidade laboral", engade Dios. "A Galiza necesita apostar pola innovación no sector tecnolóxico", destaca Adrián Dios "Necesitamos mudanzas na estrutura produtiva para trasladar a forza de traballo cara a sectores intensivos na creación de valor, e por iso a Unión Europea (UE), que non a Galiza nin o Estado español, está intentando volver ser punteira en termos de innovación para poder evolucionar nos sectores tecnolóxicos, e a economía galega precisa estar aí", conclúe o profesor da USC. Emprego indefinido A contratación indefinida medrou en xaneiro 17,9%, mentres que a temporal caeron en 10,4%. Porén, segundo sinala a Nós Diario o economista Joám J. Romero Durán, "as cifras de desemprego están a ser enganosas, pois non inclúen os traballadores e traballadoras fixas descontinuas que atravesan períodos de inactividade, no que nin cobran salario nin teñen dereito á prestación por desemprego naqueles casos nos que non cotizaran o suficiente". "Así, do total de 7 millóns de contratos indefinidos que foron asinados no ano 2022 a nivel estatal, aproximadamente un terzo, 2,3 millóns, corresponde aos chamados fixos descontinuos, que aumentaron de 12 a 33%", aclara Romero Durán. Francisco González Sío: Secretario de Emprego da CIG O secretario confederal de Emprego da CIG, Francisco González Sío, alerta que "a cada vez maior dependencia da Galiza do sector servizos fai estragos no emprego". Ademais, demanda "un cambio de modelo produtivo e a derrogación das reformas laborais de PP e PSOE para recuperar a negociación colectiva e mellorar así as condicións laborais, salariais e sociais da clase traballadora galega". González Sío tamén denuncia que a maioría das persoas empregadas nos servizos “sofren contratos fixos descontinuos”. Maica Bouza Seoane: Secretaria de Emprego de CCOO Para Maica Bouza Seoane, secretaria de Emprego de CCOO na Galiza, os datos do paro "reflicten un dos menores incrementos do desemprego no mes de xaneiro da serie histórica". Bouza Seoane pon o foco en que "o maior crecemento do paro feminino provoca que seis de cada dez persoas desempregadas sexan mulleres". Ademais, tamén subliña "o crecemento da contratación indefinida en 17,9% fronte a caída da temporal en 10,4%", feito que achaca ao "impacto" da reforma do mercado de traballo. José Luís Fernández Celis: Secretario Xeral da UXT Segundo o secretario xeral de UXT na Galiza, José Luís Fernández Celis, "persisten problemas que hai que tratar, como o paro de longa duración, para o que é necesario reformar as políticas activas de emprego para que realmente melloren as oportunidades de atopar un emprego". Paralelamente, afirma, "hai que mellorar a cobertura do sistema de prestacións por desemprego, xa que no mes de decembro só se beneficiaron 88.742 persoas dunha prestación, de maneira que a taxa de cobertura situouse en 68%".