Unha nova protesta de traballadores de Vitrasa, a concesionaria municipal do transporte urbano en Vigo, levou o alcalde, Abel Caballero, a suspender novamente o pleno desta segunda feira durante uns dez minutos. Como vén sendo habitual, empregados de Vitrasa asistiron como público ao salón de plenos e, nun momento dado, cando o rexedor tomou a palabra, levantáronse e comezaron coa súa reivindicación.
Con todo, nesta ocasión, Caballero suspendeu o pleno ipso facto, sen chamarlles a atención nin pedirlles que estivesen en silencio, como adoita ser habitual, abandonando o rexedor a sala. A pesar de todo, os traballadores da concesionaria continuaron durante uns minutos coas súas proclamas, lamentando a "covardía" de Caballero por "non dignarse a escoitar".
"Vitrasa é un servizo público. Debería ser de calidade, pero non é de calidade", subliñaron, mentres criticaban que algúns concelleiros abandonasen tamén o pleno. "A responsabilidade é do Concello de Vigo", engadiron, indicando que non lles gusta "vir suspender o pleno" e solicitando que "alguén os reciba e escoite", apuntando directamente a Abel Caballero, por ser o "responsábel primeiro do servizo do transporte público".
Tamén falaron do suposto reequilibro económico que prepara o Concello para Vitrasa, "sospeitando" do mesmo xa que o Goberno local nunca ensinou ningún documento ao respecto, a pesar das reiteradas peticións da oposición e mesmo da Valedora do Pobo. "Se ninguén ten nada que ocultar, por que non se vai ensinar?", destacaron.
O alcalde decide suspender a sesión e marcha do salón de Plenos ante unha nova petición do persoal de Vitrasa para que Abel Caballero e o seu goberno atendan as súas reivindicacións para unha saída á folga no bus urbano que dura xa 93 días pic.twitter.com/Rca9bmas3P
— BNG Vigo #VigoMáisAlá ✊🏼 (@bngvigo) February 26, 2024
"Gustaríanos obter algunha resposta, que alguén nos recibise, que alguén nos escoitase. Pero se o que debería facelo marcha en canto empezamos a falar, dá igual o que fagamos. Non queremos armar barullo, pero si que nos escoiten", engadiron.