O persoal do Consorcio Galego de Igualdade e Benestar, responsábel da rede de escolas infantís A Galiña Azul, residencias, centros de día e outros servizos públicos, está chamado á folga a partir do vindeiro mes de setembro, e até decembro, con paros de 15 días mensuais para denunciar a situación de "fraude de lei" que, aseguran, padecen por mor do "abuso da temporalidade".
Nesta segunda feira, a través dun comunicado remitido aos medios, a CNT, entidade convocadora, vén de lamentar a "nula intención política de negociar para evitar a parálise" duns servizos que afectan máis de 5.000 familias na Galiza.
"O proceso selectivo que se está a negociar non busca a estabilización do persoal e desmantelará os equipos de traballo. O resultado será a perda de capital humano, algo insubstituíbel, e redundará na diminución irremediábel da calidade do servizo", denuncian, nun manifesto no que se desculpan coas familias por chegaren a este extremo.
Demandas do persoal para desconvocar a folga
No texto lembran tamén as súas demandas: "Exiximos un proceso diferenciado do da Xunta por ser o Consorcio un ente non integrado, e con particularidades, que de non telas en conta, suporían unha grave discriminación: durante máis de dez anos as nosas nóminas foron entre 30% e 40% máis baixas que as do persoal da Xunta; non tiñamos acceso a formación; o Consorcio empezou a funcionar hai 15 anos, e pretenden que o cómputo máximo para a experiencia no posto sexa de 25 anos. Agora queren que compitamos nun mesmo proceso no que estariamos claramente en desigualdade de condicións", precisan.
Neste senso, piden que a súa experiencia no traballo diario no Consorcio conte o triplo que en calquera outra administración, "exactamente igual que ocorre no ámbito doutros entes como o Consorcio", indican.
O persoal pide que a OPE para as prazas con "abuso da temporalidade" teña unha fase de oposición non eliminatoria
Así, exixen tamén que o concurso de méritos valore 90% a experiencia no posto de traballo e 10% a formación, e urxen que puntúe no proceso a formación especializada recibida dentro do propio Consorcio.
De forma paralela, instan a que a oferta pública de emprego (OPE) para as "prazas con abuso de temporalidade entre 3 e 5 anos" teña unha fase de oposición non eliminatoria, "tal e como recolle a lei".
"Se non se cumpren estas exixencias, o proceso selectivo resultante non será para a estabilización do persoal temporal abusado; será un ERE encuberto de mulleres que culminará co desmantelamento dos equipos de traballo", advirte o persoal.
