A CIG convocou folga indefinida a partir desta segunda feira, día 23, na tenda de Massimo Dutti que Inditex ten aínda operativa no centro comercial das Cancelas, en Compostela. A convocatoria prodúcese logo de que a multinacional comunicase a súa decisión de fechar este e outros centros de traballo.
Carmen Naveira, representante da CIG, aclara así que a das Cancelas "non é a única tenda" que a empresa prevé clausuarar, pois a pasada semana tamén anunciou a súa intención para os Bershka de Vilagarcía e Pontevedra e mais o Kiddy's Class de Vigo, precisa o sindicato. Unha medida que afectará, segundo os seus números, unhas 45 traballadoras.
"Para xustificar esta medida, a empresa ampárase unha vez máis no acordo alcanzado con CCOO e UXT sobre o proceso de dixitalización das vendas", apunta a organización sindical. Sobre esta cuestión, Naveira afirmaba recentemente a Nós Diario que o devandito acordo "non ten validez", dado que "na Galiza quen ten a máxima representación é a CIG".
Polas súa parte, fontes de Inditex consultadas por Europa Press sinalan que "o fechamento desta tenda forma parte do plan de optimización da superficie comercial e todos os traballadores afectados van recibir ofertas de recolocación noutras tendas, como vén sendo a norma en todos os casos en que se produciron fechamentos e como foi acordado cos sindicatos a nivel estatal".
Unha valoración ben distinta é a que fan desde a CIG, entendendo que o acordo "permite [a Inditex] fechar tendas non porque dean perdas, senón para obter máis beneficios á conta das traballadoras". Desde a central sindical critican que os fechamentos "non van acompañados dun proceso de recolocación con garantía de mantemento do emprego e de condicións laborais e salariais".
Así, sosteñen que as vacantes que ofrece a empresa "non teñen un mínimo de calidade" e "a alternativa que queda ás traballadoras é a de acollerse a unha praza en peores condicións, algunhas con xornadas semanais ridículas ou con horarios que lles impiden conciliar".
Á convocatoria na tenda de Massimo Dutti das Cancelas poderanse sumar máis tendas do resto das cadeas afectadas polos fechamentos previstos pola multinacional do sector téxtil, e a CIG, ao mesmo tempo, avanza novas concentracións para protestar contra a clausura de tendas da compañía.
