A CIG-Saúde exixe a adopción de medidas urxentes para "mellorar as condicións de traballo" das e dos profesionais de Atención Primaria, ao considerar que o feito de que quedasen desertas 39 prazas MIR de Medicina Familiar e Comunitaria na Galiza "confirma que incrementar o número de prazas MIR non é suficiente para ter máis profesionais".
A central sindical cre que "só así" poderá ser atractiva esta especialidade e conseguir, deste modo, "rachar coa actual dinámica de falta de profesionais". "Definir os cadros de persoal reais nos centros de saúde que poidan responder, con calidade, ás demandas da cidadanía, limitar as cargas de traballo, dignificar a docencia, reforzar as estruturas de xestión ou apostar por unha Atención Primaria vertebradora do territorio", son algunhas das propostas de CIG-Saúde.
Neste contexto, a través dunha nota de prensa, o sindicato detalla esta terza feira que do total de 202 prazas desertas no conxunto do Estado español, 39 son en centros sanitarios galegos, das que "20 son na área sanitaria de Lugo; 14, na de Ourense; e cinco, na de Ferrol".
Así, destaca que a Galiza é a segunda comunidade con máis prazas desertas, despois de Castela e León, con 55. Do mesmo modo que ocorreu o pasado ano, lamenta, a especialidade "non resultou o suficientemente atractiva para os futuros R1".
De feito, na convocatoria do ano 2022 "quedaron 200 prazas de Medicina de Familia sen cubrir" e "foi necesario forzar unha segunda quenda de elección, na que aínda quedaron sen cubrir 93, seis delas na área sanitaria de Lugo".
A convocatoria de este ano xa incluíu a posibilidade de pór en marcha unha segunda quenda de elección que está pendente de facerse, lembran desde a CIG.
