A través dun comunicado, o comité vincula esta situación supostamente irregular coas direccións das residencias da terceira idade de Caranza-Ferrol e de Oleiros, pois entende que ambas están "obrigando" a auxiliares de enfermaría "a facer funcións desempeñadas polo persoal titulado en grao de enfermaría".
Desde a Xunta négano e afirman que, de acordo co que figura no convenio do Imserso, o persoal de enfermaría "prepara a medicación" e as auxiliares "adminístrana".
O comité apunta que as e os auxiliares "carecen de formación en farmacoloxía"
"Non levou a cabo ningún cambio de funcións", apuntan fontes da Consellaría de Política Social.
"Sempre que nunha residencia pública leva a cabo unha mellora organizativa, esta se consensúa co persoal", afirma.
A pesar destas explicacións chegadas desde o Goberno galego, no comité indican que, en cadanseu comunicado interno das dúas direccións, "fan unha modificación do regulado por lei" e afirman que no remitido desde a residencia de Ferrol fálase "claramente" de "preparar" medicamentos. Respecto diso, apuntan que as e os auxiliares "carecen de formación en farmacoloxía".
O comité entende que isto implica "unha nova baixada da calidade asistencial, o que demostra unha vez máis o desprezo tanto ao seu persoal coma ás e aos residentes". Falan así dunha "orde temeraria" que pode levar a "incurrir nun posíbel intrusismo".
Na procura de persoal de enfermaría
Curiosamente, a falta de profesionais na rama de enfermaría parece unha problemática coa que loitan os xeriátricos nos últimos tempos. Non é difícil atopar todo tipo de ofertas destinadas a xente con estes estudos en páxinas web de contratación. De feito, unha das grandes bolsas de emprego en diversos centros é a de Domusvi.
