A dirección de Einsa Print comunicou esta segunda feira aos representantes sindicais dos traballadores a intención de aplicar un expediente de regulación de emprego (ERE) de extinción que afectaría un total de 162 traballadores das plantas das Pontes e das oficinas de Madrid.
Desde o comité de empresa asegúrase que a empresa de artes gráficas alega "causas organizativas e produtivas" para xustificar a medida.
Agora, a parte social está a analizar a documentación trasladada na reunión desta segunda feira, na cal o comité xa reiterou o seu absoluto rexeitamento ao ERE e abordará co persoal as accións para levar adiante.
Así, detallaron que unha empresa como Einsa, "que recibiu máis de 50 millóns de euros en axudas públicas, non pode ter como primeira opción a destrución de 162 postos de traballo sen buscar nin negociar outro tipo de medidas alternativas".
Por iso, o comité tamén reclama ás Administracións públicas que "supervisen a utilización deste diñeiro público por parte da empresa, así como a súa implicación activa na procura de solucións que non supoñan deixar na rúa a case 70% do actual persoal".
Centros de traballo
Nas instalacións das Pontes, situadas no polígono de Penapurreira, traballan 227 persoas, mentres que, nas oficinas de Madrid, só hai 15 empregados, descoñecendo por agora "a afectación concreta en cada un dos centros", pero estimando que "o groso dos despedimentos aplicarase nas Pontes".
Así, a empresa deu por iniciado o período de consultas e esta terza feira, 31 de outubro, está convocada ás 15 horas unha asemblea xeral de traballadores para informar do ERE e acordar "as medidas para levar adiante en defensa da continuidade dos empregos".
