A temporalidade laboral aséntase na Galiza: crece 14% e afecta xa 166.400 persoas

A Galiza contou no terceiro trimestre de 2023 con 117.200 persoas desempregadas (9,3%) tras baixar en 2.500 neste período marcado polos meses de verán. A cifra supón 2,13% menos que tres meses antes, segundo os datos da Enquisa de Poboación Activa (EPA) que deu a coñecer esta quinta feira o Instituto Nacional de Estatística (INE). En relación ao emprego por sectores, o de servizos foi outra vez o máis activo (+8.100 persoas ocupadas), seguido da construción (+4.200) e industria (+1.000). Na desagregación por ramas de actividade, a maior creación de emprego prodúcese nas actividades sanitarias e de servizos sociais (+10.500) e na hostalaría (+4.700). Pola contra, a destrución de postos de traballo foi maior na educación (-4.100), no transporte (-3.500) e no comercio (-2.600). No que respecta á calidade do emprego, a taxa de temporalidade é de 17,6%, cun aumento da temporalidade laboral de 20.900 persoas en relación ao período anterior, pasando de 145.500 a 166.400 (+14,3%). Por sexos, a ocupación masculina aumenta en 11.900 empregos, mentres que a feminina só en 2.300. O emprego aumenta a xornada completa (+15.800) e diminúe a xornada parcial (-1.600 empregos). O paro subiu en 92.700 persoas no terceiro trimestre do ano no Estado español 18,4% de desemprego na mocidade Esta quinta feira tamén se souberon os datos de paro xuvenil facilitados de maneira oficial a través dun informe do Instituto Galego de Estatística (IGE), que reflicten unha taxa no terceiro trimestre de 18,4% (+0,4 puntos porcentuais máis que nos tres meses anteriores). En total de 327.300 mozas e mozos de entre 16 e 29 anos que hai no país, 136.200 (41,6%) teñen traballo, mentres que 30.600 (9,3%) están parados e 160.400 restantes (49%) están inactivos. Dos 126.900 da mocidade asalariada nova, 58,5% está vinculada á empresa por medio dun contrato indefinido, caendo 1,1% respecto ao trimestre anterior, mais aumentando 32,7% en comparación con setembro de 2022. Maior temporalidade En opinión do secretario de Negociación Colectiva da CIG, Francisco Sío, "é fundamental ver que tipo de emprego se crea, onde e cales son as consecuencias de ter un mercado tan feble no caso de que entremos nun período económico desfavorábel". En conversa con Nós Diario, salienta que a maior parte do novo emprego está "nas persoas menores de 24 anos, en concreto 10.500 máis, cando temos unha taxa de paro de 24% na mocidade, case a mesma que no trimestre anterior", polo que conclúe que o dato coincide "coa entrada no mercado de traballo fóra do período lectivo". O incremento de afiliación á Seguridade Social na Galiza fica por baixo do estatal Por sectores explica que segue a dominar o de servizos, "sobre todo na hostalaría e nos servizos sociais, este último relacionado de maneira directa cos campamentos de verán". En relación á taxa de temporalidade, a central sindical nacionalista salienta que, con respecto ao trimestre anterior, este aumentou en dous puntos situándose en 17,6%. "Son sete décimas menos que hai un ano mais hai que ter en conta que houbo un medre moi importante que demostra que o empresariado perdeu o medo á reforma laboral, en concreto ao contrato por circunstancias de produción e abusa da temporalidade", advirte Sío, "algo que afecta en gran medida e de maneira directa a xente moza, que mantén na actualidade a mesma taxa de desemprego", engade. Horizonte preocupante Desde Comisións Obreiras consideran positivos os datos da EPA. Porén, sinalan que algúns dos parámetros recollidos nela -como a perda de emprego indefinido ou a menor taxa de actividade-, teñen, en palabras da súa secretaria de Emprego, Maica Bouza, "un horizonte preocupante" sobre o cal "cómpre actuar". Por iso, o sindicato avoga por utilizar as capacidades con que conta o Goberno galego e empregar o seu "principal instrumento, os orzamentos, para investir en materia de emprego". Neste sentido, CCOO chama a atención sobre o escaso crecemento dos orzamentos galegos en materia de emprego. Así, lembran que "mentres que as contas da Xunta da Galiza aumentarán 4,6 % en 2024, as da Consellaría de Emprego e Igualdade incrementaranse 2,4%". Por último, consideran que hai que ter en conta, cos datos desta EPA, que hai 49.300 fogares con todas as persoas en desemprego (3,3 % máis que no trimestre precedente) e 28.800 fogares onde non entra ingreso ningún (+14,3 %). A cifra de persoas cun emprego baixou en todos os sectores agás no da construción Paro de longa duración Desde a UXT salientan que, malia que "está a ser un ano positivo para o mercado laboral, rexistrando incrementos da ocupación e das persoas asalariadas, aínda queda un longo camiño por percorrer até solucionar os problemas que afectan as persoas traballadoras". Neste sentido, o seu secretario de Organización, José Luis Fernández Celis, recorda a alta porcentaxe de persoas desempregadas de longa duración, definidas como aquelas que levan máis dun ano en procura de emprego. "Neste terceiro trimestre, 34,7% do total eran de longa duración, o que reflicte a dificultade para reincorporarse a un emprego por parte deste colectivo", asegura. O paro de longa duración na Galiza aumentou 45% nunha década Neste sentido, UXT demanda que se dispoñan todos os “medios para evitar que suceda esta situación, cunhas políticas activas de emprego eficientes e un Servizo Público de Emprego con recursos humanos e técnicos que faciliten o seu traballo”.