22,6% dos especialistas en Medicina Interna contan con máis de 60 anos

Uun total de 38 camas da área de Medicina Interna permanecen fechadas desde o 1 de xullo no hospital da Mariña, en Burela. As vacacións de verán viñeron complicar a falla de persoal nunha especialidade que presenta un déficit estrutural desde hai anos. Tanto é así que a carencia de medios está a provocar ao longo de todo o ano a derivación de doentes ao Hospital Universitario Lucus Augusti (Hula), emprazado na cidade de Lugo, a máis de 80 quilómetros de distancia do centro mariñán. O hospital Mariña dispón de 10 prazas de facultativos da especialidade de Medicina Interna, pero a metade delas permanecen vacantes durante todo o ano. Unha situación análoga dáse no hospital de Monforte de Lemos, outro centro de Atención Especializada integrado na área sanitaria de Lugo, A Mariña e Lemos, que mantén fechadas as 28 camas da área de Medicina Interna. CIG e Defensa da Sanidade Pública cargan contra a decisión da Xunta de "privatizar" as interrupcións de embarazos A situación destes dous centros repítese noutros hospitais do Servizo Galego de Saúde (Sergas). Así, o persoal do hospital do Barbanza, en Ribeira, leva meses mobilizándose para solicitar especialistas en Medicina Interna, pois a súa falla ten obrigado a deixar fóra de servizo 30 camas hospitalarias. Nesta liña, denuncia que o centro conta con 10 prazas de facultativos de Medicina Interna, pero só a medade delas están cubertas durante todo ano. A maiores, destaca que non se trata dun problema conxuntural, senón que xa era perceptíbel desde antes da pandemia da Covid. O caso dos hospitais de Valdeorras e Verín, na área sanitaria de Ourense, é semellante. O primeiro deles perdeu nos últimos seis anos cinco facultativos de Medicina Interna, no marco dunha redución do cadro de persoal que deixou o centro sen especialidades como Uroloxía, Dermatoloxía ou Pneumoloxía, malia ser o distrito sanitario con máis casos de silicose do país. Ao tempo, o número de médicos e médicas internistas do hospital de Verín ficou reducido á metade, pasando de oito profesionais en 2015 a catro na actualidade. Belén Trigo García, profesora de Dereito Civil da USC: "Na sanidade temos dereito á información e a decidir" Un problema xeneralizado A ausencia de especialistas en Medicina Interna é común a todos os hospitais do sistema sanitario galego, mais afecta de maneira particular aqueles centros de carácter comarcal. A isto contribuíu a Lei 1/2018, pola que se modifica a Lei de saúde da Galiza, que significou a desaparición das áreas sanitarias do Barco de Valdeorras, A Mariña, Monforte e O Salnés e abriu a porta ao desprazamento de persoas usuarias e profesionais dentro da área, derivando recursos dos hospitais comarcais aos centros de referencia, a custa de separar os servizos dos cidadáns e de diminuír a cobertura sanitaria nos espazos vilegos e rurais. Os hospitais do servizo galego de saúde contan con 390 prazas de facultativos de Medicina Interna, mais unha parte significativa das mesmas fican vacantes durante todo o ano. A este respecto, o Ministerio de Sanidade, nos datos ofrecidos polos indicadores chave do Sistema Nacional de Saúde de 2021, último ano con cifras, sinala que 58,5% da oferta está atendida por mulleres, destacando que os centros de Atención Especializada da Galiza disporían de 14,5 médicas e médicos internistas por cada 100.000 habitantes, no caso de que todas as prazas estivesen cubertas. O Sergas recibe máis de 2.000 solicitudes de ascenso na carreira profesional no primeiras cinco horas de prazo Galiza rexistra os cadros de persoal máis envellecidos do Estado en Medicina Interna. Segundo as últimas cifras ofrecidas polo Ministerio de Sanidade, 49,7% das e dos profesionais desa especialidade que permanecen nos hospitais galegos superan os 50 anos, colocándose a continuación Castela e León, con 48,6%. A maiores, 27,1% das médicas e médicos internistas da Galiza contan con entre 50 e 59 anos e 22,6% conta con máis de 60 anos. Conflito A falla de profesionais na especialidade de Medicina Interna débese ao escaso atractivo das prazas como consecuencia das condicións laborais. Neste sentido, profesionais veñen denunciando nos últimos anos a precariedade dos contratos, a inestabilidade laboral e a elevada carga asistencial. Así, por exemplo, o pasado ano, viviuse un duro conflito entre a Xunta da Galiza e o colectivo dos médicos internistas, que levou o Colexio de Médicos da Galiza a cualificar de "inaceptábel" a situación destes profesionais e a denunciar “a gran sobrecarga asistencial que veñen soportando nos últimos anos”. A precarización da profesión está a provocar a fuxida de MIR con formación en Medicina Interna cara a outras comunidades do Estado español ou mesmo cara á sanidade privada. De feito, en 2022, formáronse dúas persoas nesta especialidade no Hospital Clínico Universitario de Santiago de Compostela (CHUS), rematando unha na sanidade pública madrileña e outra nun centro privado. Bruxelas constata un retroceso na Galiza en sanidade, ensino e innovación Asemade, en 2021, tres médicos acabaron o MIR no CHUS, mais ningún deles continuou a súa vida profesional nese hospital. Neste contexto, as necesidades de especialistas en Medicina Interna están chamadas a incrementarse nos próximos anos. Se na actualidade estes servizos sanitarios xa son uns dos que máis carga de ingresos soportan e maior actividade teñen, polo que se consideran unha das áreas con máis peso no funcionamento hospitalario, o maior envellecemento da poboación e o aumento de pacientes crónicos obrigan a reforzar a oferta destes profesionais na Atención Especializada galega. Oitenta e oito profesionais de Medicina Interna xubilaranse até o ano 2026 Un total de 88 profesionais de Medicina Interna xubilaranse até o ano 2026. Segundo as proxeccións efectuadas en febreiro 2023 polo servizo de estudos do Sindicato Médico de Granada, tomando como referencia as cifras ofrecidas polo Ministerio de Sanidade do Goberno do Estado para 2021, último ano con cifras, entre 2022 e 2026 cesarán na súa actividade arredor de 88 médicas e médicos internistas, que se corresponden con aqueles profesionais que se atopaban por encima dos 60 anos de idade no exercicio de 2021. Os datos fornecidos polo Ministerio de Sanidade avanzan que a oferta de prazas MIR na especialidade de Medicina Interna para as anualidades de 2022 a 2026 serán insuficientes para cubrir as xubilacións que se produzan na Galiza. A este respecto, a oferta de formación prevista de residentes en Medicina Interna para ese período é de 91 prazas, pero atendendo á porcentaxe de persoas que renunciaron a continuar como profesionais na rede pública galega nos últimos tres anos o seu número final ficaría na metade. A Xunta gastará 1 millón ao mes no plus para os médicos que traballan tamén na privada Así, as limitacións á oferta de prazas MIR impostas polo Goberno do Estado en base á taxa de reposición aprobada polo Executivo de Mariano Raxoi, seguindo as orientacións da Comisión Europea, vense agravadas no caso galego pola decisión da Xunta da Galiza de ofertar un número de prazas inferior ao autorizado desde o Executivo estatal e polas condicións laborais ofrecidas polo Servizo Galego de Saúde, que provocan unha fuga de profesionais cara a outros territorios do Estado español con mellores perspectivas.