Xunta de Galicia: "Comercial de..."

Comercial: persoa que traballa para unha organización que xera estratexias de promoción e venda dun produto, de maneira que poidan chegar ao consumidor de forma eficaz. Actividade mercantil. Por definición, dedicarse á "pública" ten como obxectivo administrar e xestionar de maneira hábil e transparente os recursos públicos, tanto os materiais como os humanos, de maneira que se poidan satisfacer as necesidades primordiais da sociedade. Sucede isto coa Xunta de Galicia? Creo que non. A administración do Partido Popular está agora en disputa cos xuíces galegos, pois non lle dan a razón no tema dos eólicos. Como bo "comercial", o señor Rueda pelexa con todas as súas armas para que a xudicatura lle dea a razón en algo que é inxusto, pois neste momento, temos cuberto con moito a nosa cota enerxética. E como alumno avantaxado, implícase de forma intensa na eólica mariña, desprezando os mariñeiros galegos. Actúa de forma descarada, concedendo autorizacións a minas que son contaminantes dos terreos onde están localizadas e responsábeis da degradación posterior da contorna, a través das terras e das augas. Exemplos temos, co perigo de facer fracasar as campañas marisqueiras pola contaminación das nosas rías. Beneficios a esgalla Apoian e apoiaron os lobbies e a grandes fortunas, como foi o caso da banca galega: as caixas de aforros foron espoliadas e entregadas a un magnate venezolano con inxentes beneficios, grazas ao bo labor dos Gobernos de Alberto Núñez Feijoo, primeiro, e Alfonso Rueda, despois. Por que o Goberno da Galiza está en contra da Lei de Vivenda? Será porque as grandes inmobiliarias do país poden perder enormes ganancias coa especulación existente? E as eléctricas. Non temos máis que recordar o Sr. Galán botándose enriba de Feijoo cando gañou as eleccións. Beneficios a esgalla, mentres os cidadáns pagan pola electricidade cantidades desorbitadas. E no transporte público? Lobbies acaparan todos os servizos, cunha administración que mira para outro lado ante as desfeitas do día a día nos desprazamentos. A Xunta fai bandeira das residencias doadas por Amancio Ortega, que o PP está "entregando" ao clero e a institucións que só queren un lucro rápido Sanidade e coidados En sanidade, a administración do Partido Popular alíase coa alta tecnoloxía sanitaria e despreza a contratación de persoal, que é o que máis precisa o sistema. Faino con salarios de miseria, inestabilidade e precariedade laboral, dicindo "que non encontran profesionais para cubrir prazas", co que o desmantelamento está garantido. Así, estamos vendo que a privatización é a estratexia do Partido Popular. O tema dos aparcadoiros nos recintos hospitalarios xa é de traca. As residencias de maiores, en mans da iniciativa privada, mesmo facendo bandeira de residencias doadas á pública por Amancio Ortega, que o PP está "entregando" ao clero e a institucións que só queren un lucro rápido e non atención de calidade para as persoas maiores. É indecente. Cero residencias públicas en 14 anos de goberno. Opóñense á revalorización das pensións segundo o IPC. Incrible, pero certo. A súa pretensión é subilas "o 0,25% cada ano". Vaia miseria. Xa non falemos do Salario Mínimo Interprofesional, que se supón que beneficiaría unha ampla poboación (non a lobbies, concretamente). Pero son así, "é o seu carácter". Desprezan as gandeiras e gandeiros galegos cos prezos do leite máis baixos do Estado español; ao igual que os mariñeiros e a industria en xeral. Mais iso si, rebaixan os impostos ás grandes fortunas: indecente. Turismo Alíanse co Camiño de Santiago e o turismo en xeral, buscando cantidade e non calidade, sen respectar os dereitos da veciñanza por onde pasa ou termina o camiño, que deben "supeditarse" ao éxito Rueda. Non falemos dos colectivos Lgtbi e da Lei Trans. Nalgúns lugares onde goberna o PP, pretenden cambiar as leis que defenden os seus dereitos. Tanto "respectan" a autonomía de Galicia, que, en 14 anos, pediron cero transferencias ao Estado español. Son capaces de facer de "comercial" de Ikea, de promover a Tarxeta Benvida e de que se gasten os cartos públicos nesta multinacional sueca desprezando o pequeno comercio. E poderíamos seguir ad infinitum: a patronal do eucalipto, a dos xogos de apostas, a CRTVG, o fomento da universidade privada, etc. E sabendo todo isto, hai xente que os vota e aínda conseguiron varias maiorías. Esperemos que nas vindeiras eleccións ao Parlamento da Galiza o vento cambie, para ben dos cidadáns galegos!