A acción penal do xuízo polo accidente do tren Alvia encara a súa penúltima semana de comparecencias coas declaracións previstas de dous peritos propostos por Avogacía do Estado, que representa Adif, e outro por parte da defensa do maquinista Francisco Garzón.
En concreto, está citado para esta terza feira día 31 Antonio Puyol, director da empresa especializada en instalacións ferroviarias Airtren, que ten entre os seus clientes a Adif, Renfe, o Ministerio de Fomento e a Axencia Estatal de Seguridade Ferroviaria.
Puyol elaborou unha peritaxe para Adif, cuxo ex director de seguridade na circulación está procesado na causa.
Este perito xa cobrou no seu momento polo encargo e agora recibiu outros 60.000 euros por actualizar o informe e para preparar a súa comparecencia.
Febreiro arrincará na cuarta feira coa directora de seguridade de Adif, Esther Mateo, quen tamén elaborou unha peritaxe a pedimento do administrador de infraestruturas ferroviarias.
A quinta feira día 2 está previsto que declare Miguel Yunquera por un informe a proposta do avogado do maquinista, que tamén encargou peritaxes a Anxo Sanz Cubero (día 7) e á especialista en factor humano Pilar Calvo (8 de febreiro).
Precisamente o exsecretario da CIAF (comisión de investigación de accidentes ferroviarios) recoñeceu na súa intervención no xuízo que a intención deste organismo foi contar con Pilar Calvo para elaborar o seu informe, o único realizado polo Estado español.
Finalmente Calvo non participou e a CIAF só sinala ao exceso de velocidade como causa do sinistro.
Acción civil
O inicio da práctica da acción civil está sinalado para o 14 de febreiro de 2023. A partir dese día resérvanse as terzas, cuartas e quintas feiras para a proba documental, as conclusións e os informes.
O xulgado admitiu as declaracións de 522 testemuñas (declararán unha media de 15 ao día), 21 testemuñas/peritas e 126 peritos, sen prexuízo de que as partes desistan dalgunha testifical antes ou durante o xuízo.
