O xerente do Servizo Galego de Saúde (Sergas), José Flores, apuntou a 2023 como horizonte para a recuperación das listas de espera cos tempos anteriores á pandemia de Covid-19.
Nunha entrevista concedida a Cadena Ser Galicia este domingo, Flores recoñeceu que "grandes expertos" sinalaron que serán necesarios dous anos para recuperar os niveis anteriores á pandemia.
Respecto a as listas de espera, o xerente recoñeceu que houbo que realizar unha reprogramación de cirurxías e citas.
"Aprendemos moito a nivel organizativo", destacou Flores sobre a crise provocada polo coronavirus, onde se traballa "coa inseguridade de que igual o protocolo dun día non valía para o seguinte".
Neste tempo, comentou, desenvolvéronse novas formas de traballo, como a videoconsulta, e outras se practicaron aínda máis, como a consulta telefónica, "unha ferramenta que se implementou en 2013 pero que se potenciou para aumentar a seguridade". "Hai cousas que chegaron coa pandemia para quedar", asegurou Flores.
O responsábel do Sergas tamén comentou a eliminación das máscaras en interiores, que entra en vigor esta semana; unha medida "esperada" pero que hai que tomar con "precaución". "Aquí vimos experimentando un comportamento exemplar por parte dos galegos", defendeu Flores que, con todo, recalcou o comportamento "impredicíbel" do virus. "Non se pode descartar nada", dixo.
José Flores tamén se mostrou cauto ante unha posible aplicación da cuarta dose da vacina contra a Covid. En caso de ser así, aposta porque sexa para maiores de 60 e diferente ás administradas até o de agora.
Por último, defendeu que na Galiza a sanidade privada e a pública "van da man". Ademais, apuntou que se estudará máis investimento nos próximos orzamentos e que hai problemas que son "estruturais", como a falta de profesionais.