A medida que se estende o uso do patinete eléctrico na Galiza as cidades e vilas van tomando as súas medidas para regular a mobilidade neste medio de transporte. A última en aprobar unha normativa foi Vigo, cuxa xunta de Goberno local deu o visto e prace a un proxecto de ordenanza que limita o emprego do patín.
En concreto, segundo transcendeu esta terza feira, a norma estipula que quedará prohibido usar estes vehículos en grandes estradas da cidade, así como as de carácter interurbano.
Tamén estará limitado o emprego en zonas peonís, a excepción da área de Bouzas e o Casco Vello. Nestes lugares a velocidade máxima será de 10 km por hora e mantendo unha distancia de 1,5 metros en relacións a xente que vaia a pé.
As sancións, que poden chegar mesmo aos 500 euros en función da gravidade das infraccións, tamén poderán penalizar a falta de casco.
Neste sentido, o Concello quere que sexa obrigatorio que se leve casco e chaleco ou roupa reflectora para evitar riscos no tráfico.
Tamén se requirirá seguro de responsabilidade civil e certificado de circulación ou ter unha idade mínima de 15 anos.
Zonas vetadas
Por exemplo, entre as zonas onde será multado o uso de patíns están a Gran Vía -no tramo entre a rúa Venezuela e a Praza de América-, o avenida de Castelao, a de Citroën, Arquitecto Palacios ou a avenida de Madrid.
Outros puntos restrinxidos son os pasos soterrados e as beirarrúas.
Por seguridade
A velocidade estará controlada ao igual que o uso de auriculares ou teléfono móbil mentres se conduce. Igualmente, será motivo de sanción ir baixo os efectos de alcol ou drogas.