A plataforma Plademar, creada en 2016 para velar pola protección da contorna natural e da ría de Muros e Noia, entregou este sábado os primeiros Premios Plademar no marco do Ría Fest, un festival que busca pór en valor a defensa do medio ambiente da riqueza mariñeira.
"Quixemos recoñecer o labor de diferentes persoas que tiveron un papel fundamental na preservación do noso patrimonio natural, da ría de Muros-Noia, do marisqueo e da pesca tradicionais", afirman desde a entidade que preside o mariñeiro e divulgador Rogelio Santos, colaborador deste diario.
Premios Plademar
Plademar premiou "o traballo desinteresado e gratuíto" realizado por Irati García Tomé, ex concelleira do BNG en Noia, "quen tivo un papel fundamental na creación da nosa asociación e nos axudou na nosa primeira gran loita contra a Lei de acuicultura"; Joám Evans, voceiro da plataforma contra a mina de San Fix, "un pilar indispensábel no que apoiarnos nestes anos de loita contra a contaminación da mina de San Finx", e Liliana María Solís Pais, bióloga, "pedra angular do proxecto EcoNoia, co que se extraeron decenas de toneladas de lixo mariño".
O Coliseo Noela foi o escenario da entrega dos primeiros Premios Plademar nunha gala presentada por Rogelio Santos e a mariscadora e influencer Mercedes Silva, Totakeki, que finalizou cun espectáculo creado para a ocasión polo coro catalán Les Singulars.
Foi o primeiro acto dunha xornada que terá continuidade ao longo do día e que sitúa o foco sobre a ría de Muros e Noia, sobre os seus cinco concellos e sobre os homes e mulleres do mar, "pero sobre todo, sobre a defensa e coidado do medio ambiente", salientou Rogelio Santos.
Caída da produción
O presidente de Plademar alertou da caída da produción. "De berberecho, de ameixa, e de distintas especias como apuntan os datos científicos: anguía, troita, lamprea, salmón, xurelo, polbo... Ano tras ano vense minguadas e semella que todo o lixo que se bota ao mar e todo o dano que se lle fai é pouco, por iso consideramos que temos que seguir a reivindicalo, por máis que haxa a quen non lle guste".
O Ría Fest, organizado por Plademar coa axuda da Concellería de Cultura do Concello de Noia, coa colaboración da confraría, Noia Histórica, Somos Enredos, Adicae e o apoio de boa parte da hostalaría local, continuará esta cunha mesa redonda sobre a importancia de coidar a ría, coa participación de Blondiemuser, Mariscadora 2.0, Totakeki e Rogelio Santos e coas actuacións de Barahúnda e Flow del Norte, o dúo de rapeiros conformado por Dake_Gz e Puga.
Por mor da chuvia, os concertos previstos ao aire libre de Mondra, Boyaka Kostova e Chicho Selektor comezarán ás 21.30 horas no Coliseo Noela. A entrada será gratuíta mais será preciso retirar un convite no despacho de billetes, aberto desde as 19.30 horas.
