A plataforma cidadá Queremos Galego presentou esta cuarta feira perante a delegación do Goberno español na Galiza unha relación de alegacións en contra da sanción que lle foi anunciada pola institución dous meses e medio despois da realización do evento en que se terían producido os destrozos que lle atribúen ao colectivo: a manifestación do 17 de Maio.
A organización está acusada de "guindar globos e ovos recheos de pintura" e de "realizar diversas pintadas en entidades bancarias e locais comerciais".
No concreto, Queremos Galego tería que responder por pintadas como 'Turismo é colonialismo', outra símbolo feminista na tenda de roupa e complementos Oysho e de máis unha realizada en Deutsche Bank e no Banco Santander na que se pode ler 'Lume ao capital'. "Ningunha delas ten a ver co obxectivo da manifestación, a defensa da lingua galega", indica o colectivo cidadán nas alegacións presentadas.
Até 6.000€ de multa ''para evitar que o pobo galego saia ás rúas''
Así as cousas, negaron os feitos denunciados e remítese á propia denuncia para sinalar que "as pintadas estaban dentro do itinerario da manifestación mais en ningún momento se sinala que fosen feitas durante o seu percurso nin que os seus autores fosen manifestantes". Os feitos foron cualificados polos denunciantes, a policía de Compostela, como “infracción grave”, sinalando como responsábel á organización do evento, Queremos Galego.
A infracción podería ser sancionada cunha multa de entre 300,52 a 6010,12 euros, as mesmas cuantías que se fixan na denuncia que lle anunciaron á Plataforma polo Aborto por idénticos feitos: "numerosos destrozos" que se terían realizado na mobilización do 16 de xuño.
A "sospeitosa coincidencia nas argumentacións" das denuncias contra ambos colectivos sociais leva a Queremos Galego a encaixar o proceder do Goberno español "nunha campaña orquestrada para criminalizar os movementos sociais". Aliás, subliñan que o que se pretende é, "pola vía da represión, evitar que o pobo galego saia ás rúas".
Xornalismo de calidade e en galego, sen ti, sería imposíbel!
Facer un xornalismo crítico sen máis ataduras que as que nos unen á promoción e defensa dos intereses galegos precisa da túa colaboración. Subscríbete.