O BNG proporá na vindeira sesión plenaria do Parlamento Galego “crear un ente ferroviario que garanta un tren de proximidade, interior e de calidade”.
O proxecto coñecido como Galtren será a resposta ás demandas dos galegos e galegas “a un problema que arrastramos desde hai moito tempo, como é a situación na que se atopa o sistema ferroviario galego”.
Recentemente, explicou a viceportavoz do BNG, Olalla Rodil, “víamos esa viaxe inaugural a Madrid, a segunda vez que se inauguraba o AVE a Galiza, acompañada de grandes pompas da Xunta para festexar 20 anos de atraso e incumprimentos dos gobernos de PP e PSOE”.
“Pero o AVE -dixo Rodil- non resolve todos problemas e agravios de infraestruturas, e moi especialmente no tren”.
“Sen ir máis lonxe, o exemplo máis evidente, palmario e groseiro témolo en Lugo, única capital sen conexión directa con Santiago de Compostela, que mantén unha liña sen electrificar e cun único servizo con Santiago de Compostela que foi eliminado a semana pasada”, apostilou Olalla Rodi.
A maiores, a nacionalista cualificou como “o colmo do indecente” o suceso acontecido a pasada semana, cando as persoas usuarias do traxecto Lugo-Ourense quedaron “tiradas” na estación pola falta de maquinista.
O tren, un aliado contra a crise climática
Por iso, e porque a formación considera o tren como “unha peza chave na loita contra a crise climática, na descarbonización e na economía, pero tamén factor para garantir a cohesión e vertebración territorial e o impulso da mobilidade colectiva”, no vindeiro pleno a portavoz nacional do BNG, Ana Pontón, preguntará a Núñez Feixoo “se cre que está sendo útil para enfrontar os problemas que ten Galiza”.
