As protestas por Palestina e a memoria de 1980 (cando as protestas de Censa interromperon a carreira) reciben a Volta na Galiza

A Volta a España chega este domingo á Galiza, na etapa 15, que parte da Veiga (Asturias) para rematar en Monforte (Terra de Lemos) 168 km despois. A segunda feira é día de descanso e a terza, día 9, será a etapa Poio (comarca de Pontevedra)-Mos (comarca de Vigo) para, na xornada seguinte, día 10, partir o pelotón do Barco rumbo El Morredero (O Bierzo). A Coordenadora Galega de Solidariedade con Palestina chamou todos os colectivos, asociacións e movementos sociais a sumarse á mobilización convocada durante as etapas que pasan pola Galiza.

Galiza dá así a remuda ás mobilizacións que se están a dar polos diferentes territorios ao paso desta proba e que obrigaron mesmo a  suspender o final de etapa en Bilbo ou, onte, a interromper uns momentos a carreira no Angliru (Asturias). O presidente da Deputación de Pontevedra, Luís López, compareceu onte para, desentendéndose do xenocidio, expresar o seu apoio á Volta: "Que ninguén manche o nome das Rías Baixas", dixo, xerando unha vaga de indignación nas redes sociais. 

A Volta xa sabe o que é que o seu paso pola Galiza sexa escenario de protestas de diferente tipo. Mesmo de que houbese que interromper unha etapa. Aconteceu o 6 de maio de 1980, ao paso da Volta a España polo Porriño (comarca de Vigo), localidade onde os traballadores da metalúrxica Censa levaban meses de folgas, protestas e mobilizacións.

Ese día, traballadores que estaban mesturados entre o público saltaron á calzada cando os corredores levaban percorridos 15 quilómetros da etapa Vigo-Ourense e detiveron a caravana. Axiña interveu a Garda Civil, cargando contra os traballadores. Houbo disparos de balas de goma e, segundo testemuñas presenciais que recolleu a prensa, algún tiro de pistola ao aire. Dez obreiros resultaron feridos nas cargas. A carreira estivo suspendida media hora, o que obrigou a unha neutralización e á suspensión dunha meta volante.

Nos incidentes tivo un papel destacado o coche dunha emisora radiofónica no que viaxaba o famoso comentarista deportivo José María García. Segundo o comité de Censa, o coche tratou de rachar o bloqueo dos traballadores cando xa a caravana estaba detida e bateu en dous deles. Inmediatamente, un grupo de manifestantes parou o vehículo e rompeulle o parabrisas. Non foi a máis o incidente.

A Volta proseguiu o seu curso, igual que a loita de Censa, chegando a ocupar o Consulado de Venezuela en Vigo.