A potencia eólica en tramitación na Galiza cuadriplica a actualmente existente

O Consello Econó- mico e Social (CES) presentou na xornada de onte un relatorio sobre a situación do sector enerxético galego. O traballo, elaborado por un grupo de investigadores da Universidade da Coruña (UDC) dirixido polo profesor dese centro e colaborador de Nós Diario Fernando de Llano, traza unha panorámica sobre o estado actual do complexo eléctrico, analiza as súas principais fortalezas e debilidades e define liñas de actuación cara ao futuro. Neste sentido, os autores revelan a gran potencialidade do país neste ámbito e, tamén, os problemas que enfronta. 26% da hidráulica Galiza é unha gran potencia en xeración eléctrica. A este respecto, o informe do CES sinala que “a importancia a nivel estatal tradúcese en que produce: 1 de cada 4 megawatts (26% en 2021) de electricidade xerada por recursos hídricos do Estado; 16% da electricidade xerada por enerxía eólica no Estado e 19% dos residuos renovábeis, que inclúe biomasa, biogás e enerxías mariñas”. A Xunta cede ao capital privado a maioría accionarial na sociedade mixta para impulsar as renovábeis O documento do CES afirma que “o parque galego de potencia instalada para a xeración de electricidade dispón dunha quinta parte da potencia estatal hidráulica, de 13,6% da potencia instalada estatal eólica, de 14,7% das tecnoloxías que empregan residuos renovábeis para xerar electricidade e de 9% da coxeración instalada no Estado”. A densidade de potencia eólica instalada é un indicador moi preciso para coñecer o nivel de desenvolvemento desta tecnoloxía de xeración nun determinado territorio. Así, o documento do CES constata que Galiza atópase á cabeza do Estado español nese parámetro con 0,131 megawatts por quilómetros cadrados (MW/Km2), situándose á cola Madrid con 0,000 MW/Km2. O gran peso das enerxías renovábeis na produción de electricidade na Galiza ten permitido reducir de maneira considerábel as emisións de gases de efecto invernadoiro (GEI) nos últimos anos. Nesta dirección, o relatorio do CES indica que “as emisións de GEI estaban na Galiza en 29,013 millóns de toneladas de dióxido de carbono equivalente en 2015, ao mesmo nivel que desde 1990. En só cinco anos, de 2015 a 2020, rebaixáronse en 18,602 millóns de toneladas, o que supuxo unha minoración de 35,9%”. 3.879 MW eólicos A potencia eólica instalada na Galiza sitúase na actualidade en 3.879 MW, que xerou en 2022 máis de 9.719.900 de megawatts hora de electricidade e representou 72,7% do consumo total do país, fixado para ese exercicio en 13.359.478 megawatts hora. O SLG demanda "transparencia e información" sobre os 75 parques eólicos aprobados Porén, neste momento atópanse en tramitación outros 17.550 MW, cuxa entrada en funcionamento implicaría cuadriplicar a capacidade de produción eléctrica do país, que no pasado exercicio destinou á exportación 40,5% da electricidade xerada. O relatorio dos CES avanza que a Xunta da Galiza tramita actualmente 7.200 MW, incluídos en 275 parques emprazados en 189 localidades galegas. A estes debésenselle engadir 4.023 MW en aprobación por parte do Goberno estatal, que ten competencia para autorizar todos aqueles complexos eólicos cunha potencia superior a 50 MW. Asemade, as compañías enerxéticas teñen rexistradas solicitudes para desenvolver 6.327 MW de eólica mariña nas augas galegas, cunha capacidade de xeración que duplica a prevista polo Ministerio de Transición Ecolóxica (Miteco) para todo o Estado español. O proxecto de Marsk A potencia das diversas modalidades eólicas proxectadas na Galiza superaría en 6.550 MW a potencia prevista para o conxunto estatal até 2026. Ademais, aos 17.550 MW en tramitación débense sumar 4.000 megawatts que o grupo Maersk ten previsto xestionar para a súa factoría de biometanol no porto de Langosteira, na Coruña, mais que non ten solicitado. O traballo redactado polo equipo dirixido por Fernando de Llano adianta novas tendencias no negocio eólico. A este respecto, apunta que “mentres que os primeiros parques se situaron en zonas montañosas, sobre terras fundamentalmente de uso forestal, nos últimos 12 anos os parques eólicos pasaron a ser implantados tanto en zonas de monte como en terras con vocación gandeira e agrícola”. A Xunta autoriza a construción do parque eólico Rodicio II, en Maceda e Montederramo A marxe de beneficio das instalacións eólicas tense incrementado de maneira moi importante na última década. Neste sentido, o estudo de CES constata que “as innovacións tecnolóxicas no sector eólico permitiron que nos últimos 12 anos se incrementase a eficiencia da tecnoloxía en 20%, reducindo os custos de investimento unitario en 10%”. De feito, as compañías enerxéticas recoñecen nas súas memorias económicas que recuperan os investimentos da montaxe dos parques eólicos en menos de tres anos, como acontece no parque eólico do Reboiro en Baralla, no parque dos Cotos en Cerdedo-Cotobade ou no Fonte de Barreiros. As compañías eléctricas con actividade na Galiza rexistraron en 2022 uns ingresos de 1.989,6 millóns de euros. Segundo un informe elaborado polo colectivo de debate enerxético Bidán, “a maior facturación correspondeuse cos meses de marzo con 252,4 millóns de euros; outubro con 188,4 millóns, xaneiro con 165,2 millóns e decembro con 163,4 millóns”. A utilidade pública dos parques eólicos No primeiro trimestre do ano os números das empresas víronse favorecidos pola alza de prezos da electricidade e, no último, pola elevada produción.