Traballadores e traballadoras do Servizo Galego de Saúde (Sergas) convocados polos sindicatos CESM Galicia, CO-BAS e Prosagap volveron concentrarse no día de hoxe ás portas do Hospital Montecelo e do Provincial para pedir a dimisión da responsables da área sanitaria de Pontevedra-O Salnés e protestar contra a precariedade laboral e a privatización de servizos.
O representante do sindicato Comisións de Base (CO-BAS), Rafael Vázquez, lamentou que despois de varias semanas de mobilización dos traballadores aínda non lograron que se estabelezan "liñas de diálogo sólidas" co equipo directivo dos hospitais.
Segundo este portavoz sindical, o único encontro que mantiveron recentemente co xerente José Ramón Gómez "non serviu para achegar posturas" xa que, segundo explica, a dirección entende que esas reunións son "meramente informativas" e non se pasan os datos concluíntes para debater os problemas sanitarios e de persoal.
Entre outras queixas, os sindicatos reprocharon á Xerencia que non lles informase da "privatización" do servizo de Mantemento, unha circunstancia da que, conforme denuncian, decatáronse polos pregos de contratación desta prestación. "Eles din que só é mantemento preventivo cun contrato por tres anos, pero é o mesmo que en Vigo. Xa nolo temiamos", criticou Vázquez.
Os sindicatos CESM Galicia, CO-BAS e Prosagap tamén temen o peche da Lavandaría do Provincial coa perda dos postos de traballo deste departamento e sospeitan que sucederá a mesma operación cos servizos de Esterilización e de Cociña. Segundo expón Rafael Vázquez, o SERGAS ten intención de trasladar estas áreas a Vigo: "É unha barbaridade, desde Vigo é imposible servir a todos os hospitais", afirmou.
Os representantes dos traballadores piden a revisión do Plan Director do Hospital Gran Montecelo para que se contemplen as necesidades que quedaron patentes durante estes meses coa crise da pandemia e continúan reclamando negociación, planificación e a contratación de máis persoal.
Peche de camas
Nas súas protestas tamén alertaron do previsible peche de máis de 75 camas hospitalarias durante este verán, unha situación que, segundo censuran, repítese todos os anos por estas datas. Nesta ocasión os sindicatos advertiron de que os hospitais da área sanitaria quedarán en precario ante un posible rebrote da pandemia da Covid-19.
Reclaman, así mesmo, que os servizos de Urxencias e de atención a pacientes de coronavirus refórcense este semestre para estar alerta ante calquera novo brote da pandemia.
Os sindicatos pregúntanse como se vai a remontar a actividade que non se realizou durante estes meses de estado de alarma e denuncian que a xerencia se está saltando as listas de contratación para cubrir os meses estivais.
Así mesmo, afirman que se está contratando, de maneira "irregular", a profesionais aos que se chamou para cubrir a etapa do coronavirus evitando recorrer ás persoas que se atopan nas listas, como se estableceu a través dun acordo. Tamén de demandan unha planificación da actividade asistencial transparente tanto para Atención Primaria como para Atención Especialidade.
Dimisión da xerencia
Por todas estas razóns, os manifestantes pediron a dimisión da xerencia dos hospitais de Pontevedra. Segundo denunciou Rafael Vázquez, "o de aquí é unha xestión desastrosa, deste xerente e do seu equipo directivo. Dedican o seu tempo a amañar os datos sobre o coronavirus. Amenten descaradamente cando falan do número de traballadores dos Hospitais contaxiados e que pasaron o coronavirus".
Por último, aseguraron que o persoal sanitario continúa con problemas de déficit de luvas e máscaras.
