A máscara deixará de ser obrigatoria en exteriores o 10 de febreiro

Así o confirmou a ministra de Sanidade, Carolina Darias, que anunciou na mañá desta sexta feira que a vindeira terza o Goberno estatal eliminará a obrigatoriedade do uso das máscaras en exteriores, logo de que se debata este asunto no seo do Consello Interterritorial do Sistema Nacional de Saúde a comezos de semana.

"Confirmo que a vindeira terza feira levaremos ao Consello de Ministros o Real Decreto en virtude do cal eliminaremos a obrigatoriedade do uso das máscaras no exterior", sinalou a ministra nunha entrevista na Cadena Ser.

Darias afirmou que o uso da máscara en espazos exteriores foi unha medida "útil" que fixo un "efecto barreira" ante o incremento constante de contaxios, se ben hoxe "os indicadores están a mellorar" e o nivel de circulación do virus "minguou arredor de 30%". O Goberno do Estado decidira volver estabelecer a máscara como obrigatoria no exterior o pasado 22 de decembro, antes do Nadal e da expansión de Ómicron.

Agora Sanidade entende que se dan as condicións para materializar unha das peticións máis reclamadas nas últimas datas por territorios como Catalunya, Madrid ou a Galiza.

Preguntada a respecto de por que se forzou a convalidación das máscaras no decreto no que ían as pensións para días despois eliminar a obrigatoriedade destas, explicou que "a convalidación é unha previsión constitucional". "No mes de decembro adoptáronse unha serie de acordos, un deles a volta das máscaras ante o crecemento exponencial e a incerteza desta variante", subliñou.

A medida quedará publicada no Boletín Oficial do Estado (BOE) a vindeira cuarta feira, a fin de que entre en vigor a quinta, 10 de febreiro.

Antiviral de Pfizer e novo medicamento de AstraZeneca

Sobre o antiviral de Pfizer, a titular de Sanidade sinalou que están a piques de terminar a parte contractual e esperan que "en pouco tempo" poida asinarse a compra e dispor deses antivirais. Ademais, Darias sinalou que esta sexta feira van dar a coñecer un acordo con AstraZeneca "en virtude do cal se adquirirá un medicamento que se suma a estes outros na loita do coronavirus".

Explicou que estará indicado para aquelas "persoas inmunocomprometidas e que as doses que se lles inoculan non chegan a alcanzar ese nivel de protección de anticorpos". O tratamento estará dispoñíbel "ao longo deste mes de febreiro".

Europa pode entrar en "fase de tranquilidade"

Precisamente esta quinta feira o director da Oficina Rexional para Europa da Organización Mundial da Saúde (OMS), Hans Kluge, apuntou que o continente ten "unha oportunidade para tomar o control da transmisión" da Covid-19 debido á "unha gran inmunidade derivada da vacina e natural por parte de Ómicron, unha pausa estacional favorábel ao saír do inverno e a menor gravidade de Ómicron".

Para Kluge, é "posíbel" responder as "novas variantes que inevitabelmente xurdirán" sen volver instalar o tipo de medidas disruptivas que precisabamos antes. "A máxima prioridade é levar todos os países a un nivel de protección que lles permita aproveitar esta oportunidade e mirar cara adiante, cara a días máis estábeis", destacou.