"Manipular e censurar": Críticas á TVG pola cobertura da manifestación deste domingo contra a celulosa de Altri
A cobertura realizada pola Televisión da Galiza (TVG) da manifestación deste domingo en Santiago de Compostela contra o proxecto industrial de Altri xerou unha vaga de críticas nas redes sociais, acusando o medio público de minimizar a mobilización e desvirtuar o seu significado político e social.
Milleiros de persoas saíron este domingo ás rúas da capital galega para expresar de maneira clara o seu rexeitamento ao proxecto baixo o lema #AltriNon, mais, segundo denunciou a conta 'TVG censura', a TVG relegou a protesta a un plano secundario nos seus informativos. A mobilización foi presentada, critican, "como unha peza máis, sen contexto nin relevancia acorde coa dimensión da convocatoria", e situada entre contidos alleos ao motivo da protesta.
Así, na cobertura que fixo o Telexornal Serán non se incluíron declaracións directas das entidades convocantes, Ulloa Viva e Plataforma en Defensa da Ría de Arousa (PDRA). Pola contra, recolléronse referencias a un comunicado da empresa promotora, Altri, fragmentos seleccionados "con lupa" e espazos dedicados a introducir polémicas externas que, segundo os denunciantes, nada tiñan que ver co obxecto da mobilización.
📺❌ Cando o problema non é a mobilización, senón a manipulación 😤
— TVG censura (@tvgcensura) December 15, 2025
Miles de persoas saírono domingo á rúa para expresar con claridade #AltriNon: o seu rexeitamento lexítimo a un proxecto industrial que consideran daniño. Porén, a cobertura da TVG volveu poñer o foco noutro… pic.twitter.com/M6W69ZIOhi
Desde 'TVG censura' tamén se cuestiona que, inmediatamente despois da información sobre a protesta, a TVG ofrecera declaracións da secretaria xeral do PP na Galiza, Paula Prado, á que si se lle concedeu voz propia, reforzando a percepción dun tratamento informativo desigual.
As denuncias subliñan que non se trata dun erro puntual nin dunha cuestión de criterio xornalístico, senón dun modelo recorrente de cobertura que "dilúe o esencial" e resta centralidade a feitos "claramente noticiábeis", "desfigurando o sentido dunha protesta cidadá lexítima".
"Un medio público debería explicar o que pasa, non agochalo nin desprazalo do centro do relato", afirman, lembrando que informar implica tamén decidir que é relevante. Ao seu xuízo, a cobertura da manifestación contra Altri constitúe un novo exemplo de "manipulación e censura" por parte da televisión pública galega.
