O humor será un dos protagonistas da II Gala dos Medios en Galego, que decorrerá mañá sábado 2 de febreiro, a partir das 12 horas no Pazo da Cultura de Pontevedra. Un evento para o que as entradas -de balde- xa están a piques de se esgotaren, segundo advirte a Asociación de Medios en Galego, organizadora da gala.
As gargalladas estarán aseguradas con Touriñán, un dos referentes, até a súa despedida, do programa da TVG "Land Rober". Aliás, interpretou o papel de Paquito Charlín na serie “Fariña” e tamén actuou na pelicula “Os Fenómenos”. Con Marcos Pereiro, formou Mucha e Nucha, as cantareiras de Ardebullo.
Nunha nota de imprensa, a asociación, da que forma parte Sermos Galiza, lembra que o humor tamén era un dos fíos que tecían “O Tío Marcos da Portela”, xornal que saiu á luz o 7 de febreiro de 1876, momento que precisamente se conmemora no Día dos Medios en Galego.
A música correrá a cargo de Ugía Pedreira e tomarán a palabra Xaime Iglesias, da asociación Cedofeita, Eva Mejuto, do Salón do Libro, Anxos Sobriño, de Cotenol, o debuxante Kiko da Silva, o profesor Luis Álvarez Pousa e representantes do Concello de Pontevedra, Deputación de Pontevedra, Xunta de Galicia e da Asociación de Medios en Galego.