Guille, o rapaz de 14 anos en rehabilitación dun grave accidente ao que a Xunta deixa sen poder recibir aulas

Esta quinta feira realizouse en Noia unha cazolada en protesta aos recortes en educación que imposibilitan o regreso as aulas de Guille. Após dous anos de rehabilitación por un accidente de tráfico, Guille de 14 anos volveu ás aulas do IES Campo De San Alberto de Noia. A familia confirmou en maio o regreso do rapaz, tanto ao centro como a Consellaría de Educación, esta última confirmou en xuño que tiña o dereito a unha persoa coidadora a tempo completo.

Alías, o centro adaptou as súas instalacións para garantir á volta de Guille e para o inicio de curso o pai do rapaz colleu unha semana de permiso para favorecer a súa adaptación xunto a súa coidadora. O que atoparon o 8 de setembro é que Guille non dispón deste servizo fundamental para a súa volta ao instituto, xa que desde a Consellaría tan só lle concederon un coidador  dúas horas ao día, que imposibilita o regreso as aulas do rapaz. A pesar das manifestacións, reclamacións e visitas da inspectora, Educación continúa ignorando a problemática.

Alexandra Pacheco, profesora no IES Campo de San Alberto de Noia, a onde este curso se tiña que incorporar Guille, afirma que Guille “tería que estar cursando 4°ESO, coma calquera neno da súa idade”.

A docente conta nas súas redes sociais a situación deste alumno, que o día de Noiteboa de hai dous anos sufriu “un terríbel accidente de tráfico xunto co seu irmán maior, que ía ao volante e faleceu no acto. Logo de varios meses en coma e tras un proceso de rehabilitación intenso e tortuoso, a familia e o equipo médico deciden que chegou o momento de incorporarse á vida académica de novo este curso”.

“Comunícasenos con tempo ao noso centro e á Consellaría, que confirma o dereito a unha persoa coidadora, coma calquera alumno nas súas circunstancias. Todo é celebración no instituto, incluso naqueles que sen coñecelo, vivimos a emoción dese reencontro coa vida e coa esperanza que supón o seu retorno. Pois ben, a día de hoxe Guille continúa sen persoa coidadora”, relata Pacheco.

“Seu pai chega cada mañá no seu coche adaptado, cada dia co xesto un pouco máis triste, renunciando a traballar para acompañalo dende que comezou o curso o día 8 de setembro. E alí permanece pegado á cadeira de rodas, agardando un servizo ao que todas sabemos que ten dereito, pero que non aparece. Pasan os días. Manifestacións, reclamacións, visitas da inspectora... nada fai efecto. A Consellaría fai caso omiso e só se dedica a parchear. Todo se sente menos dende un despacho con moqueta de San Caetano”, escribe esta profesora no IES Campo de San Alberto de Noia.